قازاقستان دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ جانە وزبەكستان دارىلىك زاتتاردى, مەديتسينالىق ماقساتتاعى بۇيىمدار مەن مەديتسينا تەحنيكاسىن ساراپتاۋ جانە ستاندارتتاۋ مەملەكەتتىك ورتالىعىنىڭ اراسىندا ىنتىماقتاستىق تۋرالى مەموراندۋم جاسالىپ, قول قويىلدى.
قول قويۋ تاشكەنت قالاسىندا 21-22 قاراشا كۇندەرى وزبەكستاندا ءوتىپ جاتقان قازاقستاندىق مەديتسينا كۇندەرىنىڭ شەڭبەرىندە جۇزەگە استى.
تاراپتار دارىلىك زاتتار, مەديتسينالىق ماقساتتاعى بۇيىمدار مەن مەديتسينا تەحنيكاسىن ساراپتاۋ, ستاندارتتاۋ جانە ولاردىڭ ساپاسىن باقىلاۋ, فارماكولوگيالىق قاداعالاۋ, عىلىمي زەرتتەۋلەر جۇرگىزۋ تاجىريبەلەرىن جانە دارىلىك زاتتار, مەديتسينالىق ماقساتتاعى بۇيىمدار مەن مەديتسينا تەحنيكاسىنىڭ اينالىمىن رەتتەۋ سالاسىندا اقپاراتتار الماسۋ ءداستۇرىن قالىپتاستىرۋعا كەلىستى.
قۇجاتتارعا رەسپۋبليكالاردىڭ رەسمي وكىلدەرى – ۇيىمداردىڭ ءبىرىنشى باسشىلارى قازاقستان رەسپۋبليكاسى دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ «دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ» شجق رمك باس ديرەكتورى – باسقارما توراعاسى ارنۇر نۇرتاەۆ جانە وزبەكستان رەسپۋبليكاسىنىڭ فارماتسەۆتيكالىق سالانى دامىتۋ اگەنتتىگىنىڭ «دارىلىك زاتتاردى, مەديتسينالىق ماقساتتاعى بۇيىمدار مەن مەديتسينا تەحنيكاسىن ساراپتاۋ جانە ستاندارتتاۋ مەملەكەتتىك ورتالىعى» مۋك ديرەكتورى شەرزود ابدۋگانيەۆ قول قويدى.
وزبەكستانداعى قازاقستاندىق مەديتسينا كۇندەرى – قازاقستان مەن وزبەكستان اراسىندا دەنساۋلىق ساقتاۋ سالاسىنداعى ىنتىماقتاستىقتى نىعايتۋعا, ەكى رەسپۋبليكانىڭ ازاماتتارىنا مەديتسينالىق كومەك كورسەتۋ ساپاسىن ارتتىرۋ جانە قولجەتىمدىلىگىن قامتاماسىز ەتۋ يىگىلىگىنە جۇمسالاتىن ءبىلىم مەن تاجىريبەنى, يننوۆاتسيالار جانە تەحنولوگيالاردى الماسۋ ماقساتىندا مەديتسينالىق ۇيىمدار اراسىنداعى ءوزارا بايلانىس اياسىن كەڭەيتۋگە باعىتتالعان ءىس-شارا. ماقسات مارەسىنە جەتتى.
