ەستەرىڭىزدە بولسا 29 مامىردا استانا قالاسى اكىمدىگىنىڭ ءدىن ىستەرى جونىندەگى باسقارماسى تاراپىنان «استانا قالاسىندا ءدىني قىزمەت سالاسىندا كورسەتىلەتىن مەملەكەتتىك قىزمەتتەر رەگلامەنتى» بەكىتىلگەن ەدى. وسى رەسمي قۇجاتتىڭ قىر-سىرىن ءتۇسىندىرۋ ماقساتىندا كەشە ەسىل اۋداندىق اكىمدىگىندە جەكە جانە زاڭدى تۇلعالارعا ارنالعان «اشىق ەسىك» كۇنى وتكىزىلدى.
وندا اتاپ ايتار بولساق, «ميسسيونەرلىك قىزمەتتى جۇزەگە اسىراتىن تۇلعالاردى تىركەۋدى جانە قايتا تىركەۋدى جۇرگىزۋ», «ءدىني ادەبيەتتى جانە ءدىني مازمۇنداعى وزگە دە اقپاراتتىق ماتەريالداردى, ءدىني ماقساتتاعى زاتتاردى تاراتۋ ءۇشىن ارنايى تۇراقتى ءۇي-جايلاردىڭ ورنالاستىرىلۋىن بەكىتۋ تۋرالى شەشىم بەرۋ», «ءدىني ءىس-شارالاردى وتكىزۋگە ارنالعان ءۇي-جايلاردى عيبادات ۇيلەرىنەن (عيماراتتارىنان) تىس جەرلەردە ورنالاستىرۋعا كەلىسۋ تۋرالى شەشىم بەرۋ» سەكىلدى قىزمەت رەگلامەنتتەرىنىڭ جايى قوزعالدى.
سونداي-اق, ءدىني بىرلەستىكتەر, ساۋدا ورتالىقتارى, قوناقۇيلەر, بازار باسشىلارى مەن كاسىپكەرلەردىڭ ويلاندىرعان ساۋالدارىنا تۇششىمدى جاۋاپتار بەرىلدى. جيىندا ارنايى ماماندار بىرقاتار ماسەلەلەر بويىنشا كەڭەستەرىن ايتتى.
جايىق ناعىماش
