استانا قالاسى پروكۋراتۋراسىنىڭ باستاماسىمەن ەلوردانىڭ قۇقىق قورعاۋ ورگاندارى مەن باسقارمالارى وكىلدەرىنىڭ حالىقپەن كەزدەسۋى ءوتتى.
ەلوردا پروكۋرورىنىڭ ورىنباسارى بولات ميزانباەۆتىڭ توراعالىعىمەن جۇمىس توبى قۇقىقتىق كومەك كورسەتۋ, بەلگىلى ءبىر زاڭداردى ءتۇسىندىرۋ, سونداي-اق وزدەرىنىڭ زاڭدى قۇقىقتارىن ىسكە اسىرۋعا مۇمكىندىگى جوق تۇرعىنداردىڭ ماسەلەلەرىن قاراۋ ماقساتىندا اۋدان تۇرعىندارىمەن كەزدەستى. جۇمىس توبىنىڭ قۇرامىندا ەسىل اۋدانىنىڭ اكىمى اسىلبەك ەسەنباەۆ, اۋدان پروكۋرورى ەربولات ءابدىروۆ, اۋداندىق پوليتسيا باسقارماسىنىڭ باستىعى الىبەك كۋجاحمەتوۆ, سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنىڭ تەرگەۋ باسقارماسى ءبولىمىنىڭ باسشىسى, قر قم ەكونوميكالىق تەرگەۋ دەپارتامەنتى باسقارماسىنىڭ استانا قالاسى بويىنشا ورىنباسارى, سونداي-اق قر قم وكىلدەرى, حقكو جانە «حالىقتى جۇمىسپەن قامتۋ ورتالىعى» كمم ماماندارى بولدى.
اكتسيا اياسىندا جۇمىس توبى بارلىعى 38 ادامدى قابىلدادى. ونىڭ ىشىندە «شىعىس», «التىن شار» جانە «جاعالاۋ 4» تك باستاماشىل توپتارىنىڭ وكىلدەرى وزدەرىن تولعاندىرعان ءارتۇرلى ماسەلەلەر بويىنشا سالا ماماندارىنان تەگىن كەڭەس الدى.
كەزدەسۋ سوڭىندا كەشەندى تەكسەرۋدى تالاپ ەتەتىن ماسەلەلەردىڭ تىزبەسى قالىپتاستىرىلدى. الداعى ۋاقىتتا اۋدان پروكۋرورىنىڭ قاتىسۋىمەن وسىنداي اكتسيانى «جاعالاۋ-4» تۇرعىندارىمەن وتكىزۋ جوسپارلاندى.
