استانادا «كەل, جاستار, وقىلىق!» رەسپۋبليكالىق ناۋقانى اياسىندا م.وتەمىسوۆ اتىنداعى وقۋشىلار سارايى الاڭىندا مەكتەپ شاكىرتتەرى مەن ستۋدەنتتەردىڭ قاتىسۋىمەن «جازعى وقۋ زالى» اكتسياسى وتكىزىلدى. شارانى «نۇر وتان» پارتياسى جانىنداعى «جاس وتان» جاستار قاناتىنىڭ استانا قالالىق فيليالى ۇيىمداستىردى.
«قازاق حاندىعىنىڭ 550 جىلدىعىنا وراي ۇيىمداستىرىلعان ءىس-شارانىڭ باستى ماقساتى – استانالىق جاستاردىڭ كىتاپ وقۋعا دەگەن قىزىعۋشىلىعىن ارتتىرۋ, جاس اقىن-جازۋشىلاردىڭ شىعارماشىلىق قابىلەتىن شىڭداۋ, تابيعات اياسىنداعى جازعى دەمالىستى ۇيىمداستىرۋ جانە تالانتتى جەتكىنشەكتەردىڭ ءوز ونەرىن پاش ەتۋىنە مۇمكىندىك جاساۋ.
اشىق الاڭدا وتكەن باسقوسۋ بارىسىندا جاس اقىندار ولەڭدەرىن وقىپ, دومبىراشىلار كۇي شەرتتى. سونىمەن قاتار, كوپشىلىكتىڭ نازارىنا استانا قالاسىنىڭ كىتاپحانالارى ۇسىنعان ادەبي شىعارمالار, شەتەل كلاسسيكاسى, فيلوسوفيا, پسيحولوگيا, مادەنيەت, ونەر, دەتەكتيۆ, عىلىم تاقىرىپتارىنداعى شىعارمالار ۇسىنىلدى. ال وي اۋقىمىن كەڭەيتۋ ماقساتىندا شارشى تاقتالاردا شاحمات وينالىپ, «جاس سۋرەتشىلەر وداعىنىڭ» مۇشەلەرى جەڭىس مولدابەكوۆ پەن مانشۇك باقىت «استانا – اسەم قالا» تاقىرىبىنداعى سۋرەتتەرىندە قالانىڭ سۇلۋ تابيعاتىن بەينەلەپ, بارشا قاتىسۋشىلاردى تامساندىردى.
ءىس-شارا سوڭىندا جاس اقىن-جازۋشىلار وزدەرىنىڭ كىتاپتارىن جينالعان قاۋىمعا تارتۋ ەتتى.
كۇنايىم ساكەن
