استانانىڭ «جاسىل بەلدەۋى» – ءبىزدىڭ ۇرپاعىمىز ءۇشىن جاسالىپ وتىرعان ماڭگىلىك مۇرا. بۇل تۋرالى مەملەكەت باسشىسى نۇرسۇلتان نازارباەۆ استانانىڭ جاسىل بەلدەۋىن ارالاعان كەزدە مالىمدەدى. ەلوردانىڭ جاسىل بەلدەۋىنىڭ جالپى كولەمى 14 827 گا, ونىڭ ىشىندە 11 502 ورمان القابى بولىپ سانالادى. قازىرگى تاڭدا اتالعان ايماقتا 9,6 ميلليون اعاش پەن 1,8 ميلليونعا جۋىق بۇتالار ءوسىپ-جەتىلۋدە.
– جىل سايىن مەن ەلوردانىڭ اۋماعىندا ورمان شارۋاشىلىعىن دامىتۋ بويىنشا تاپسىرمانىڭ قانشالىقتى ورىندالىپ جاتقانىن تەكسەرىپ, قارايمىن. بۇعان دەيىن ءبىز ورماننىڭ باتىس اۋماعىنا وتىرعىزىلعان كوشەتتەردى كورسەك, بۇگىندە بۇل ءۇردىس ورماننىڭ شىعىس بولىگىندە قالاي جۇزەگە اسىپ جاتقانىن كوردىك. الدىمەن اعاشتاردىڭ ءتۇرلى سۇرىپتاعى جيىنتىعى, ورماننىڭ ورتاسىنا قاراعاي, شىرشا, اققايىڭ سەكىلدى اعاشتار وتىرعىزىلادى. ءارى قاراي ورمان ءوزى گۇلدەپ-ءونىپ, اعاشتار مەن جاسىل-كوك كوبەيەدى. بۋراباي ورمانىنا جاسىل بەلدەۋدىڭ قوسىلۋى تولىعىمەن دەرلىك جۇزەگە استى.
قازىر ءبىزدىڭ باستى ءمىندەتىمىز – ورماندى قايتا ءتۇلەتۋ. بۇگىندە قالا ماڭىنداعى 80 مىڭعا جۋىق گەكتار جەرگە اعاش وتىرعىزىلدى. 2020 جىلعا دەيىن ونىڭ اۋماعى 100 مىڭ گەكتارعا جەتەدى, – دەدى مەملەكەت باسشىسى.
جالپى 2020 جىلعا دەيىن «جاسىل بەلدەۋدە» ءۇش نەگىزگى باعىت بويىنشا جۇمىس جۇرگىزۋ جوسپارلانىپ وتىر. ونىڭ ەڭ ءبىرىنشىسى – جاسىل بەلدەۋدى دامىتۋ, ياعني ورمان كەڭىستىگىندە ەگۋ جۇمىستارىن جالعاستىرۋ بولىپ وتىر. ماسەلەن, ەلوردانىڭ جاسىل بەلدەۋىنىڭ 1 589,2 گەكتار اۋماعىنا 2,1 ملن اعاش كوشەتتەرى وتىرعىزىلدى. الداعى 2018 جانە 2030 جىلدار ارالىعىندا 5730 گا جەرگە اعاش وتىرعىزۋ جوسپارلانىپ وتىر.
ەكىنشى باعىت – قالا اۋماعىندا 29 676 گەكتارعا دەيىن بوس جەرلەردە ورمان القاپتارىن جاساۋ. مەملەكەت باسشىسىنىڭ تاپسىرماسىن ورىنداۋ اياسىندا «ۇزدىكسىز كوگالداندىرۋ» ءۇشىن قوسىمشا 14 849 گا بوس جەر بولىنگەن. ءۇشىنشى باعىت – حالىقتىڭ جاپپاي دەمالۋى ءۇشىن جاعىمدى رەكرەاتسيالىق جاعدايلاردى قۇرۋ كەرەك بولىپ وتىر. وسى ماسەلەنى شەشۋ ءۇشىن وتكەن جىلى جاسىل بەلدەۋ اۋماعىندا جالپى ۇزىندىعى 23 شاقىرىمدى قۇرايتىن اسفالتتالعان ۆەلوسيپەد جولدارى سالىندى.
– 25 جىل ىشىندە ورماننىڭ اۋماعى كەڭەيدى. بۇل جەردە 20 شاقىرىمدىق ۆەلوسيپەد جولدارى, دەمالىس ورىندارى بار. ەڭ باستىسى, بۇل – ورمان ءبىزدىڭ تازا اۋامەن تىنىستاۋعا مۇمكىندىك بەرەتىن وردامىزدىڭ «وكپەسى». بۇل ورمان – ءبىزدىڭ ۇرپاعىمىز ءۇشىن جاسالىپ وتىرعان سىي, ماڭگىلىك مۇرا. استانا قالاسىنىڭ تەك ءىشى عانا ادەمى ەمەس, سونداي-اق, شاھار اينالاسى مەن سىرتى دا سۇلۋ كەلبەتتى. قالادا 15 مىڭ اعاش وتىرعىزىلدى, جاڭا بوتانيكالىق ساياباق, كوپتەگەن الاڭدار پايدا بولادى. حالىق اعاشتار مەن تەرەكتەردى سىندىرماي, جاسىل ءشوپتى جۇلماي, تابيعاتتى, ورماندى ايالاپ, ساقتاپ قالۋ كەرەك, ءتۇرلى اپاتتار مەن ورتتەن قورعاپ قالۋى ءتيىس, – دەدى ن.نازارباەۆ.
ءسوز سوڭىندا ەلباسى ەلوردا تۇرعىندارىن استانانىڭ «جاسىل بەلدەۋى» اۋماعىن كەڭەيتۋگە ۇلەس قوسۋعا شاقىردى. سونداي-اق, مەملەكەت باسشىسى الدا كەلە جاتقان استانا كۇنىمەن كوپشىلىكتى قۇتتىقتادى.
جالپى پرەزيدەنتتىڭ استانانىڭ اينالاسىن ورمانعا اينالدىرۋ ماسەلەسىن باستى نازاردا ۇستاۋى تەگىن ەمەس. ونىڭ ەڭ ءبىرىنشى سەبەبى ەلوردانىڭ ەكولوگيالىق جاعدايىن جاقسارتۋ بولسا, ەكىنشىسى – ادامداردىڭ تىنىعاتىن ايماق جاساۋ. سونداي-اق, پرەزيدەنتتىڭ يدەياسى ماحامبەت وتەمىسۇلىنىڭ ولەڭىمەن ۇندەس كەلەدى.
ادۋىندى اقىن:
«ەدىلدىڭ بويى ەن توعاي,
ەل قوندىرسام دەپ ەدىم.
جاعالاي جاتقان سول ەلگە,
مال تولتىرسام دەپ ەدىم» دەمەپ پە ەدى؟! قۇدايعا شۇكىر, بۇگىندە ەسىلدىڭ بويىنا ەن توعاي دا, ەل دە بار.
سەرىك جولداسباي
