ەلىمىز بويىنشا ۇبت اياقتالدى. بيىلعى ناۋقاننىڭ ناتيجەسىندە سىناققا قاتىسقان تالاپكەرلەردىڭ ەشقايسىسى ەڭ جوعارعى بالدى جيناي العان جوق. جالپى, كورسەتكىش جامان ەمەس. رەسپۋبليكا بويىنشا ورتاشا بالل 80,5 بولسا, استانامىز بويىنشا 84,65. ەندىگى كەزەكتە اڭگىمە «قايىعى سۋدان وتكەن» ۇمىتكەرلەر جايىندا بولىپ تۇر. سەبەبى سول, ولاردىڭ كەز كەلگەنى شەكتى بالدى ەڭسەردىك, ەندى قالاعان وقۋ ورنىنىڭ ەسىگى اشىق دەپ ايتا المايدى. ولاردىڭ اقىلى وقۋعا ءتۇسۋ مۇمكىندىگىنىڭ ءوزى تاڭداۋ پاندەرىنىڭ بالىنا بايلانىستى. بۇگىندە قانشاما مىڭ تالاپكەردى ءدال وسى ماسەلە تولعانتىپ وتىر.
رەسپۋبليكا كولەمىندە ەڭ جوعارعى 140 بالدىڭ 50-ءىن جيىپ, شەكتىك دەڭگەيدى ەڭسەرگەندەر سانى وسى جىلى 74 مىڭ 517 تۇلەك بولدى. ەندى شەكتى بالدى الدىق دەپ الاقايلاعان تالاپكەرلەر دە تاڭداۋ پاندەرىنەن مەجەلى 15 بالدان المايتىن بولسا, تاڭداعان ماماندىعىنا اقىلى نەگىزدە بولسا دا, بارۋدىڭ اۋىلى الىس. اقىلى نەگىزدە وقۋ ءۇشىن مەملەكەتتىك جوعارى وقۋ ورىندارىندا شەكتىك بالل – 50 بالل. ال ۇلتتىق ۋنيۆەرسيتەتتەر ءۇشىن شەكتىك بالل – 65 بالل.
ءدال قازىرگى تاڭدا مەجەلى بالدى باعىندىرعانىمەن, ءىشىنارا تاڭداۋ پاندەرىنەن جيناۋعا ءتيىس بالىنان اسا الماي, وقۋعا تاپسىرۋ مۇمكىندىگىن تاعى ءبىر سىناۋعا ءتيىس تالاپكەرلەردىڭ قاتارى ارتىپ, ۇلكەن داۋ تۋدا. بۇل ماسەلە ءبىلىم جانە عىلىم مينيسترلىگىندە تالقىلانۋدا. الداعى ۋاقىتتا بۇل مەجەلى بالل ءوزىنىڭ كۇشىندە قالۋى نەمەسە تومەن ءتۇسىرىپ, تالاپكەرلەرگە مۇمكىندىك بەرىلۋى مۇمكىن. تالاپكەرلەر ءار پاننەن العان بالدارى وسى شەكتەن اسقاندا عانا مەملەكەتتىك گرانت كونكۋرسىنا قاتىسا الادى نەمەسە اقىلى نەگىزدە وقۋعا تۇسە الادى. ەگەر شەكتەن اسپاسا, جالپى بالى نەشە بولسا دا وقۋعا قابىلدانبايدى.
مەنىڭ بالامنىڭ تاڭداۋ پاندەرى – گەوگرافيا مەن فيزيكا. ال ولاردىڭ بىرەۋىنەن – 14, ەكىنشىسىنەن 9 بالل الدى. جالپى قورىتىندىمىز 73 بالل بولسا دا, ءبىز ءوزىمىز تاڭداعان ماماندىق بويىنشا, قازاق اگروتەحنيكالىق ۋنيۆەرسيتەتىنىڭ اقىلى بولىمىنە دە تاپسىرا الماي وتىرمىز. ودان ۇبت-نىڭ الدىڭعى جۇيەسى جاقسى ەدى. بالا 50 بالل الدى ما بولدى, وقۋعا تۇسە الادى. ال بيىل ءبىزدىڭ بالىمىز اقىلى بولىمگە دە جەتپەي وتىر» دەيدى جادىرا بولەكباەۆا ەسىمدى اتا-انا.
ال №40 ورتا مەكتەپتىڭ ديرەكتورى ەربول ىرگەباي: «تاڭداۋ ءپانىنىڭ دۇرىس جاۋاپتارى بويىنشا 40 بالل الۋى كەرەك. سول 40 بالدىڭ 15-ءىن جيناي الماسا, ول بالا بولاشاق ماماندىعىنا قالاي بارادى؟ ءوزىنىڭ جانى قالاعان, ىزدەنگەن, جاقسى بىلەتىن سالاسىنان الدەن وسىنداي از بالل جيناسا, ول دۇرىس ەمەس. سوندىقتان وسى تالاپتى ءوزىم قولدايمىن» دەيدى.
وقۋعا ءتۇسۋ وڭاي بولعان قوعامدا, ماماندىققا دەگەن ماحاببات تا تومەندەيدى. ۇبت-نىڭ جاڭا جۇيەسى جاستارعا جاڭا سەرپىن اكەلىپ, الداعى ۋاقىتتا وزدەرى تاڭداعان ماماندىققا ىزدەنىمپازدىقپەن, جاۋاپكەرشىلىكپەن كەلەتىن بولادى. ءدال قازىرگى ۋاقىتتا تاڭداۋ پاندەرىنەن مەجەلى پاندەردى باعىندىرا الماعان تالاپكەرلەر جاپپاي ءبىلىم جانە عىلىم مينيسترلىگىنىڭ وسىعان بايلانىستى قابىلدايتىن قاۋلىسىن كۇتىپ وتىر.
گۇلجان راحمان
