جات اعىمنىڭ جەتەگى

ءدىني ەكسترەميستەرمەن كۇرەسۋدىڭ قيىندىعى نەدە؟ قانشا قازاقستاندىق ءدىني كوزقاراسى ءۇشىن ءومىر بويى باس بوستاندىعىنان ايىرىلدى؟ وسى جانە وزگە دە ماسەلەلەر مەملەكەتتىك قىزمەتكەرلەر مەن يمامدارعا ارنالعان سەميناردا تالقىلاندى. استانا قالاسى اكىمدىگى ءدىن پروبلەمالارىن زەرتتەۋ ورتالىعى ۇيىمداستىرعان شارادا قازىرگى دەسترۋكتيۆتى ءدىني اعىمداردىڭ الدىن الۋ جولدارى مەن وڭالتۋ شارالارىنا كەڭىنەن ءمان بەرىلدى.

قوعامدىق دامۋ مينيسترلىگىنىڭ مالىمەتىنە سۇيەنسەك, ەلىمىزدە 23 مىڭنان اسا ادام جات اعىمنىڭ جەتەگىندە كەتكەن. ونىڭ ىشىندە 800 ادام زاڭسىز ارەكەتكە بارعانى ءۇشىن سوتتالعان. «تەرروريزمگە قارسى كوميتەت» رەسپۋبليكالىق قوعامدىق بىرلەستىگىنىڭ باسشىسى امانجول ورازباەۆتىڭ ايتۋىنشا, قازىرگى تاڭدا جالعان ءدىني اعىم وكىلدەرىمەن جۇمىس جۇرگىزۋدىڭ ءتيىمدى مەحانيزمى قولعا الىنعان. ماسەلەن, دەسترۋكتيۆتى ءدىني بىرلەستىكتەردىڭ مۇشەلەرىن انىقتاۋ, ەسەپكە الۋ جانە وڭالتۋ ماقساتىندا قوعامدىق دامۋ مينيسترلىگى, ۇەۇ جانە استانا قالاسىنىڭ اكىمدىگى بىرلەسىپ جۇمىستار اتقارۋدا.
«وتكەن جىلى ءداستۇرلى يسلامعا دەس­ترۋكتيۆتى ءدىني اعىمنىڭ 940 مۇشەسى قايتارىلعان. بىراق وكىنىشكە قاراي, ونى راستايتىن قۇجات جوق. ءبىز قازىر دەسترۋكتيۆتى ءدىني بىرلەستىككە تارتىلعانداردىڭ ءاربىرىن راستايتىن بازا جاساعىمىز كەلەدى. وندا ءبىز قۇجات ارقىلى ول ادامنىڭ ءداستۇرلى يسلامنىڭ وكىلى ەكەنىن دالەلدەي الامىز. بارلىعىنا ءبىر ولشەممەن قاراۋعا بولمايدى. شىن مانىسىندە, كوبىسى – كادىمگى ءدىني كيىنىپ جۇرەتىن مۇسىلماندار» دەيدى قوعامدىق بىرلەستىك جەتەكشىسى.
جالپى, جات دىنگە ءوتىپ كەتۋدىڭ ءتۇرلى جولدارى كوپ. جاستار مەن تاجىريبەسى جوق ازاماتتاردىڭ باسىم بولىگى الەۋمەتتىك جەلى ارقىلى تاراتىلاتىن جالعان ناسيحاتتارعا ەرىپ كەتەدى. سول ءۇشىن ەلىمىز بو­يىنشا اقپاراتتىق-ءتۇسىندىرۋ جۇمىستارى دۇرىس جولعا قويىلعان. سونىمەن قاتار, «پىكىر» دىندەردى قولدانبالى زەرتتەۋ ورتالىعىنىڭ ديرەكتورى اسقار سابدين جانە نۇر-مۇباراك مىسىر يسلام ۋنيۆەرسيتەتىنىڭ PhD دوكتورانتى, ءدىنتانۋشى باۋىرجان ءاليۇلى ەلوردالىق يمامدارعا مەملەكەتتىڭ ءدىن تۋرالى ساياساتىنىڭ باسىم باعىتتارى مەن ءدىني ەكسترەميزم مەن راديكاليزمنىڭ الدىن الۋ جولدارى تۋرالى كەڭىنەن ءتۇسىندىرىپ بەردى. سەمينار سوڭىندا شارا قاتىسۋشىلارىنا ارنايى سەرتيفيكاتتار تابىستالدى.