ەلوردادا بەلگىلى جۋرناليست-پۋبليتسيست, قازاقستاننىڭ ەڭبەك سىڭىرگەن قايراتكەرى, سەناتور نۇرتورە ءجۇسىپتىڭ «جولىققان جاندار» اتتى كىتابىنىڭ تۇساۋكەسەرى ءوتتى.
شاراعا پارلامەنت سەناتىنىڭ دەپۋتاتى باقىتجان جۇماعۇلوۆ, مەملەكەت قايراتكەرى قۋانىش سۇلتانوۆ, پارلامەنت ءماجىلىسىنىڭ دەپۋتاتى دارحان مىڭباي جانە تاعى باسقا تۇلعالار قاتىستى. جيناق زەينوللا سانىك اتىنداعى مادەنيەت قورىنىڭ, قوردىڭ اتقارۋشى ديرەكتورى سەرىك اكىرامۇلىنىڭ قولداۋىمەن جارىققا شىققان. كىتاپتا تاۋەلسىزدىكتىڭ 30 جىلىندا جۋرناليستىك جولدا جولىققان بىرقاتار تۇلعالار تۋرالى سىر شەرتىلگەن. سونىمەن قاتار جيناققا قالامگەردىڭ اعالارى, زامانداستارى, ارىپتەستەرى مەن سىيلاس ازاماتتار جونىندە جازعان تولعامدارى ەنگەن.
«جيناقتاعى كەيىپكەرلەر – تۇگەلدەي اۆتوردىڭ كورگەن-بىلگەن, ومىردە ارالاسقان, كەيدە ءتىپتى دوس-جاران بولعان ادامدارى. سوندىقتان اۆتور نە جازسا دا سەندىرە جازادى, بۇرىن كوپ ەشكىم ايتپاعان, بايقاماعان وقيعالار مەن دەرەكتەردى ويناتىپ وتىرادى» دەيدى كىتاپتىڭ العىسوزىن جازعان قوعام جانە مەملەكەت قايراتكەرى مۇحتار قۇل-مۇحاممەد.
«بۇل كىتاپ – تاۋەلسىزدىكتىڭ 30 جىلدىعىنا تارتۋىم. جيناقتا 30-عا تارتا ازاماتتاردىڭ ادامدىق بولمىسىن اشىپ كورسەتۋگە باعىتتالعان ەسسەلەر توپتاستىرىلعان. ەل تاۋەلسىزدىگى جولىندا ايانباي ەڭبەك ەتكەن تۇلعالاردىڭ پورترەتىن سومداۋعا جاساعان ءبىر تالپىنىس ەدى» دەيدى پۋبليتسيست, سەناتور نۇرتورە ءجۇسىپ.
