تاياۋدا عانا شىمىلدىعىن العاش تۇرگەن مۋزىكالىق جاس كورەرمەن تەاترىندا ۇلى ابايدىڭ 175 جىلدىعىنا ارنالعان «جۇرەگىمنىڭ تۇبىنە تەرەڭ بويلا» ءمۇشايراسىندا توپ جارعان اقىنداردى ماراپاتتاۋ سالتاناتى ءوتتى. جىر دوداسىن نۇر-سۇلتان قالاسى اكىمدىگىنىڭ قولداۋىمەن ساكەن سەيفۋللين مۇراجايى ۇيىمداستىردى.
جىر جارىسىنا رەسپۋبليكامىزدىڭ ءار ايماعىنان بەلگىلى اقىندارمەن قاتار جاس تالاپكەرلەر, بارلىعى 150 اقىن قاتىستى. مۇشايراعا تۇسكەن شىعارمالاردىڭ اراسىندا كولەمدى داستاندار دا بولدى. بىراق شارتىندا پوەما بولماعاندىقتان, ول شىعارمالار قازىلار القاسىنىڭ تالقىسىنا سالىنبادى. جازۋشىلار وداعىنىڭ نۇر-سۇلتان قالاسى فيليالىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى, اقىن داۋلەتكەرەي كاپۇلى باستاعان, بەلگىلى قالامگەرلەردەن قۇرالعان قازىلار القاسى مۇشايراعا قاتىسقان شىعارمالاردى سۇرىپتاي كەلە 12 اقىنعا بايگە بەردى.
باس جۇلدەنى «ابايدىڭ بۇلاعى» دەگەن توپتاما ولەڭدەرىمەن بەلگىلى اقىن, حالىقارالىق «الاش» ادەبي سىيلىعىنىڭ لاۋرەاتى جانات اسكەربەكقىزى (نۇر-سۇلتان) يەلەندى. ءبىرىنشى ورىندى جاس اقىن قابيدەن قۋانىشبايۇلى (نۇر-سۇلتان) «ارمانى جوق ابايى بار حالىقتىڭ» اتتى ولەڭدەر توپتاماسىمەن قانجىعاسىنا بايلاندى.
ەكىنشى ورىن ەكى اقىنعا بەرىلدى. ونىڭ ءبىرىن قابىرعالى قالامگەر, «الاش», «پلاتينالى تارلان» سىيلىقتارىنىڭ لاۋرەاتى يسرايل ساپارباي (الماتى) «يماني گۇلدىڭ توركىنى» توپتاماسىمەن يەلەنسە, ەكىنشىسىن «كەمەڭگەر» ولەڭدەر تسيكلىمىن باقىتجان رايسوۆا (وسكەمەن) الدى.
ءۇشىنشى ورىن يەگەرلەرى – بەلگىلى اقىندار سەرىكجان قاجي (الماتى), بولات ۇسەنباەۆ (الماتى), ۇلاربەك نۇرعالىم (نۇر-سۇلتان). بەس ىنتالاندىرۋ سىيلىعى سەرىك ءابىلۇلى (نۇر-سۇلتان), شامەلحان بۇحاتحان (نۇر-سۇلتان), جىگەر نىسانوۆ (اقتوبە), قايرات زەكەنۇلى (سەمەي), بالتابەك نۇرعاليەۆ (الماتى) سەكىلدى اقىندارعا بۇيىردى.
