Астана қаласы Жергілікті полиция қызметкерлері жаңа оқу жылының алғашқы күндерінен бастап жүргізушілерге балаларды алып жүрудің қауіпсіз жолдары туралы түсіндіре бастады.
«Байқаңыз, балалар!» жедел алдын алу шарасы аясында өтіп жатқан ақпараттық-түсіндірме жұмыстары кезінде жол инспекторлары мектептің маңайындағы жүргізушілерге арнайы буклеттер таратып, автокресло мен арнайы ұстау құрылғыларын қалай дұрыс таңдау керектігін түсіндірді. Сондай-ақ, көлік иелері балаларға арналған орындықтардың қай түрі қауіпсіз екенін, оны қалай орнату керектігі жөнінде жан-жақты мағлұмат алды.
Әлбетте, мұндай қауіпсіздік шараларын әрбір жүргізуші білгені дұрыс. Себебі, көлік апатынан жолда демі үзіліп, ауыр жарақат алып жатқан жеткіншектер баршылық. Айталық, жыл басынан бері Астанада 58 жол-көлік оқиғасы болса, онда 58 бала әртүрлі дене жарақатын алған. Ауыр жарақат алған 20 жеткіншек көлікке арнайы ұстау құрылғынсыз отырыпты.
Дүниежүзілік денсаулық сақтау ұйымының мәліметі бойынша көліктегі балаға арналған арнайы орындықтар жасөспірімдер арасындағы өлім-жітім көрсеткішін – 54 пайызға, ауыр жарақат алуды 92 пайызға азайтады.
Кішкентай балаларды автокреслосыз алып жүрген жүргізушілер әкімшілік жауапкершілікке тартылады. Биылғы жылдың алғашқы жеті айында осы ережені сақтамаған 580 елордалық жүргізуші тиісті жазасын алған.
Астана қаласы ІІД Жергілікті полиция қызметінің инспекторы Ләззәт Бисембаеваның айтуынша, еліміздің жол жүру ережелері туралы заңнамасы бойынша 12 жасқа дейінгі балалар көлікте отырғанда, арнайы құрылғымен қамтамасыз етілуі тиіс. Ережені елемегендерге 5 айлық есептік көрсеткіш, яғни 10 605 теңге көлемінде айыппұл салынады.
Қымбат Нұрғали
