«Астана арланс» клубы Бүкіләлемдік бокс сериясының (WSB) жаңа маусымында қатарынан үшінші жеңісіне қол жеткізді. Атырауда өткен жекпе-жекте арландар қытайлық «Чайна Драгонс» боксшыларын бет қаратпай жеңді.
Шаршы алаңға шыққан шымыр жігіттердің бәрінің мерейі үстем болып, қарсыластарынан 5:0 есебімен басым түсті. Алдымен 49 келі салмақта жұдырықтасқан Теміртас Жүсіпов Хе Цзюньцзюмен кездесіп, төрешілер бірауыздан отандасымыздың жеңгенін мойындады.
Одан кейін 56 келіде Ильяс Сүлейменов есепті еселей түсті. Ол қытайлық Ван Лунды қапы қалдырды.
Үшінші болып рингке көтерілген 64 келілік Ділмұрат Мәжитов Лю Ян атты боксшыны екі рет нокаутқа жіберіп есеңгіретті. Осылайша ол командасын уақытынан бұрын жеңіске жеткізді.
Содан соң 75 келіде Сапарбай Айдаров пен Минганг Жао қолғап түйістірді. Нәтижесінде біздің боксшының абыройы асты.
Ал ең соңынан шыққан ауыр салмақтағы Антон Пинчук Сергей Новиканың осал тұсын тапты. Нәтижесінде арландар кезекті жеңісіне жетіп, «С» тобында көш бастап тұр. Енді «Астана Арланстың» келесі кездесуі 18 наурыз күні Тараз қаласында өтеді. Олар ресейлік «Патриот Боксин Тим» командасымен күш сынасады.
