Астанадан ауылға дейін…
Астана
Астанада «Құралай» ІІ Халықаралық қуыршақтар театрының фестиваліне қатысушылардың салтанатты шеруі басталды. Елорда сахналарында Тунис, Босния, Герцеговина, Бельгия, Италия, Польша, Ресей, Түркия, Эстония, Сербия және Қазақстанның қуыршақтар театрының ұжымдары өнер көрсетуде.
Атырау облысы
Астана күні қарсаңында Индер ауданы Есбол ауылдық округінде жас мамандар мен бюджеттік сала қызметкерлеріне 2 пәтерлі 10 тұрғын үйдің кілті берілді. Салтанатты шараға аудан әкімі Серік Арыстан қатысып, жаңа үй иелеріне құттықтауын жеткізді.
Шығыс Қазақстан облысы
«Бақыршық» тау-кен өндірісі кәсіпорны ресми түрде ашылды. 2014 жылы «Полиметалл» компаниясы қысқа мерзімде Жарма ауданында жаңа технологиялармен жабдықталған алтын өндіру кешенінің негізін қалады. Ашылу салтанатына «Полиметалл» акционерлік қоғамының бас директоры Виталий Несис және Жарма ауданының әкімі Нұрлан Сыдықов қатысты.
Қостанай облысы
Жангелдин ауданының тұрғындары Ахмет Байтұрсынұлы дүниеге келген үйді қалпына келтірді. Ұлт ұстазының үйіндегі ауқымды жөндеу жұмыстары әлі де жалғасатын болады.
Алматы
Алматыда елорданың 20 жылдық мерейтойына арналған дәстүрлі музыка кеші өтті. Концертті тамашалауға жиналған көрермен дәстүрлі өнер шеберлері мен «Сазген сазы» этнографиялық-фольклорлық ансамблінің орындауындағы көнеден жеткен жауһар жырды, әсем ән мен тәтті күйді тыңдап, құлақ құрышын қандырды.
Ақмола облысы
Целиноград ауданы Қосшы ауылында отбасылық-денсаулық орталығы ашылды. Жаңа заманауи жабдықпен қамтылған денсаулық орталығы бір ауысымда 150 адамды қабылдайды.
Батыс Қазақстан облысы
Зеленов ауданы Дариян ауылындағы 300 орындық мектеп құрылысы аяқталды. Білім ұясының жанында жоғары сынып оқушыларына арналған 100 орындық интернат бар.