Астана
Астана қаласындағы Ә.Мәмбетов көшесіндегі 5-үйдің сыртқы қабырғасы Ә.Қастеев атындағы музейден жиналған қазақстандық классиктердің туындыларымен толықты. Қазір бұл үй ашық аспан астындағы галереяға ұқсайды.
Шығыс Қазақстан облысы
Тарбағатай ауданының Елеке сазы жайлауынан «Алтын адам» табылды. Бұл Шығыс Қазақстан жерінен табылған бесінші бағалы жәдігер болып отыр.
Ақтөбе облысы
Ақтөбе өңіріндегі Есет батыр кесенесіне апаратын жол жөнделді. Қазақстанның киелі картасына енген Есет батыр кесенесі Алға ауданының Бестамақ ауылында орналасқан. Мұнда жыл сайын жүздеген адам келіп, зиярат етеді.
Атырау облысы
Атырауда «Samruk-Kazyna Trust» әлеуметтік жобаларды қолдау қорының «Әрекет» жобасы аясында ҮЕҰ өкілдерін әлеуметтік кәсіпкерлікке оқыту бағдарламасы аяқталды. Нәтижесінде облыстағы 16 ұйым 500 мың теңгеден грант ұтып алды. Енді жеңімпаздар 9 ай бойы өз жобаларын іске асырады.
Қызылорда облысы
Қызылордада «Қазақстанның үздік тауары» байқауының жеңімпаздары анықталды. Жеңімпаздар алдағы қазан айында Астанада өтетін республикалық көрме-байқауға қатысады.
Павлодар облысы
Ертіс ауданында осымен үшінші жыл қатарынан «Ұлы дала» этнофестивалі өтті. Шараға Қытай, Моңғолия, Тәжікстан, Өзбекстан және Ресей сияқты алыс-жақын шетелдерден делегация келді.
Маңғыстау облысы
Маңғыстау облысында көркем гимнастикадан ІІ халықаралық «Шағала» турнирі өтті. Жарысқа Өзбекстан, Грузия, Израиль елдерінен 6-15 жас аралығындағы гимнастшылар бақ сынады.
