Астанадан ауылға дейін…
Астана
Алдағы жылы елорданың 6 орталық көшесіне автобустарға арналған жолақ салынады. Bus Lane жолағы Достық, Д.Қонаев, Түркістан, Ақмешіт көшелерінде, сондай-ақ, Сарыарқа даңғылынан К.Күмісбеков көшесіне дейінгі аралықтағы Кенесары және Абай көшелерінде пайда болады.
Алматы
әл-Фараби атындағы ҚазҰУ еліміздегі бөлінген оқу гранттарының саны бойынша көшбасшы атанды. Биыл оқу орнын 6,6 мыңнан астам үздік түлек таңдаған.
Шығыс Қазақстан облысы
Семейде 2019 жылдан бастап автобустар электронды билетке көшеді. Қала басшылығы қоғамдық көліктер арасында тендер өткізіп, 170 жаңа автобус сатып алуды жоспарлаған.
Қарағанды облысы
Қарағандыда хайуанаттар бағының ескі ғимараты орнына жаңа нысан салынып жатыр. Павильондар климаттық қондырғылармен жабдықталып, жануарларды қыс мезгілінде ұстауға қолайлы болмақ.
Атырау облысы
Атырау мектептерінде 300-ден аса мұғалім жетіспейді. Соңғы кездері білім ордаларында орыс тілді сыныптарға сұраныс арта түскен.
Түркістан облысы
Бәйдібек ауданының орталығы Шаян ауылында «Нұрлы жер» бағдарламасы бойынша 55 гектар жер теліміне инженерлік-коммуникациялық инфрақұрылым жүргізілді. Аталған жер телімдері кезекте тұрған 326 тұрғынға беріледі.
Ақтөбе облысы
Ақтөбе облысына қарасты Әйтеке би ауданының Қарабұтақ ауылында «Әкелер саябағы» ашылды. Өзі туып-өскен ауылға саябақты «Рухани жаңғыру» бағдарламасының «Туған жерге тағзым» жобасы аясында кәсіпкер Қайрат Қойлыбаев тарту етті.