«Байқоңырдың» бағдары айқын
Астана радиосы мен «Elorda Aqparat» ақпарат медиа-ресурсының бірлескен жобасы – «Елорда тынысы» бағдарламасы аясында студияға, биылғы ақпан айында бас қалада төртінші аудан болып шаңырақ көтерген Байқоңыр ауданының әкімі Ерлан Қаналимов келіп, жаңа ауданның тыныс-тіршілігі туралы тыңдармандарға айтып берді. Хабарды Қайсар Жұмабайұлы жүргізді.
Жыл санап елорда халқының саны мен қала аумағы үлкейіп келеді. Бүгінде бас қала жұртының саны 1 миллионнан асты. Сондықтан тығыз орналасқан тұрғындардың мәселесін шешу үшін жаңа мектеп, балабақша, емхана, көлік жүйесі мен инженерлік инфрақұрылымдар салу мақсатында төртінші аудан құрылды. Жаңа ауданның шығыс бөлігі Алматы ауданымен, батыс және оңтүстік бөлігі Сарыарқа ауданымен, ал Есіл өзені арнасымен Есіл ауданы шекараласады. Жалпы алғанда, қала аумағы 79 мың 733 гектарды құраса, соның ішінде жаңа аудан 18, 1 мың гектарды алады. Ал адам саны 211 мыңға жетеді.
«Біздің қала 123 секторға бөлінген. Әрбір секторда 10 мың адам бар. Соның ішінен 34 әлеуметтік стандарт анықталған. Бұл – әрбір тұрғын басқа кварталға бармай пайдалануға болатын қажетті нәрселер. Ал біздің ауданда 17 сектор бар. Оның 5-уі – жобалық. Қалған 12 сектордың деңгейі біз айтқан талаптың 80 пайызын құрайды. Басқалары 20-60 пайыздық әлеуметтік стандарттармен қамтамасыз етілген» деді аудан әкімі.
Ерлан Ермекұлының айтуынша, ауданға, әсіресе, әлеуметтік нысандар жетіспейді екен. Мәселен, мектеп, балабақша, емханалар саны өте аз. Тіпті, адамдардың қарапайым спорт түрімен айналысатын орындар да сирек. Аудан аумағында көпқабатты апатты үйлер мен жеке сектор көп кездеседі.
«Ауданда 17 мектеп жұмыс істейді. Олардың дені Кеңес үкіметі кезінде салынған. Оның 7-еуінде оқушылар үш ауысыммен оқиды. Төрт мектеп ғимаратын кеңейту үшін қосымша құрылыс жұмыстары жүргізілу қажет. Қысқасы, білім ордаларының тең жарымы күрделі жөндеуді талап етеді. Қазір аудан көлемінде 1200 орындық екі мектептің құрылысы жүріп жатыр. Амандық болса, алдағы жылы пайдалануға беріледі» деді Е.Қаналимов.
Қалалық «IKomek» сараптама жүргізу орталығының мәліметіне сүйенсек, жаңа ауданның тұрғындарынан жеке үйлерді су басу туралы – 198, көшелерді жарықтандыру 106 және қоқысқа қатысты 90 шағым түскен.
«Біз осындай күрделі мәселелер қордаланып қалған 19 аймақты анықтадық. Олардың көбі жеке тұрғын үй аумағынан шығып отыр. Үйлерді су басу қаупі – кәріз желісінің жоқтығынан. Мұндай жағдай Лесозаводтағы жеке секторларда көбірек ұшырасты. Жері саз батпақ. Су көпке дейін кеппейді. Оны тек сорып алу қажет. Осы мәселелерді шешу үшін Коммуналдық шаруашылық басқармасымен бірлесіп, 5-6 сатылы желілік кәріз желісінің құрылысын аяқтау мәселесін қолға алдық. Бұл Лесозавод пен Кирпичный тұрғын үй кешенінің бір бөлігін қамтиды» деді әкім.
Аудандағы тағы бір өзекті дүниенің бірі – көшелерді жарықтандыру мәселесі. Аудан әкімдігінің зерттеуі бойынша, жеке тұрғын үйлер орналасқан 87 көшеге жарық тартылу қажет екен. Бұған шамамен 200 мың шам және 1600 бағана керек. Бұл мәселелер қыркүйекке дейін аяқталады деп сендірді әкім. Сондай-ақ, Ерлан Ермекұлы Алаш тасжолы бойындағы орталық базар аумағында инженерлік желі жоқтығын айтты. Биыл елорда басшысының тапсырмасымен аталған тасжол бойына инженерлік желілердің кешені құрылысын бастау жоспарланып отырғанын жеткізді.
Жеке тұрғын үйлері көп аумақта қоқыс мәселесі де қордаланып қалған. Енді ол бір ретке келтірілмек. Бұған дейін пайдаланылған ескі қоқыс контейнерлері еуропалық стандарттағы контейнерлермен ауыстырылмақ. Сонымен қатар, биыл аудан көлеміндегі 17 көшеге жөндеу жұмыстары жүргізілмек. Кирпичный пен Өндіріс тұрғын алабында 15 жаңа көше пайдалануға беріледі. 41 көшеге қиыршық тас төсеу жұмыстары жобаланған.
Қысқасы, Ерлан Қаналимов тыңдармандарды жаңа ауданның құрылымы мен атқарып жатқан жұмыстарымен таныстырып, алдағы жоспарымен бөлісті.