Кеше Астана қалалық мәслихатында өткен қоғамдық кеңесте бірқатар ауқымды мәселелер қаралды. Алдымен Астана қалалық Жұмыспен қамту, еңбек және әлеуметтік қорғау басқармасы басшысының орынбасары Артем Әбілдинов осы салада атқарылып жатқан жұмыстар жайында сөз қозғады. Оның айтуынша, биылғы жылы әлеуметтік төлемдерге 4 млрд 570 млн теңге бөлінген.
Жергілікті бюджет есебінен мүмкіндігі шектеулі жандарға, соның ішінде балаларға, зейнеткерлерге тегін қызмет көрсету және ақшалай төлем жасау түрінде 1 млрд 997 млн теңгеге әлеуметтік көмек берілген. Сондай-ақ, 100-ден аса адамға түрлі қаржылай қолдау көрсетілген.
Одан кейін қалалық Қаржы басқармасының өкілі Нормативтік құқықтық актілердің жобаларын қарастыру жайында қысқаша баяндама жасады.
Білім басқармасының басшысы Қасымхан Сенғазиев мектепке дейінгі ұйымдар төңірегінде әңгіме өрбітті. Бүгінде бас қалада балабақшаға кезекте тұрған балғындар саны 25 мыңнан асады екен. Сондықтан осы мәселені шешу үшін мемлекеттік тапсырыспен жұмыс істейтін жекеменшік балабақшаларға көбірек мүмкіндік беріліп отыр. Белгілі журналист Бибігүл Жексенбай балабақшадағы мамандар тапшылығын алға тартты. «Мені мемлекеттік балабақшадағы кадр мәселесі алаңдатады. Тәрбиешілер жиі ауысады. Олардың кәсіби деңгейі төмен. Мүмкін, мамандардың әлеуметтік жағдайын жақсартудың басқа да жолдарын қарастыру қажет шығар?!» деді ол. Өз кезегінде Қасымхан Сенғазиев: «Кадр мәселесі біз үшін өткір тақырып болып отыр.
2013 жылдан бері Астанадағы Гуманитарлық коледжге мемлекеттік тапсырыспен жылына 50 түлектен көбейтіп оқытамыз. Негізі, балабақшаларда қызмет істейтін тәрбиешілердің 40 пайызы басқа маман иелері саналады. Сол үшін мың жарым маманды қайта оқыту курстарын өткіздік. Мәселен, жекеменшік балабақшаларда мамандардың еңбекақысы жоғары. Көбінесе соған ауысып кетеді» деп жауап берді.
