Астана әкімі Әділбек Жақсыбековтің төрағалығымен өткен кезекті аппарат кеңесінде қаладағы абаттандыру жұмыстары мен сауданы ұйымдастыру мәселелері талқыланды деп хабарлады қала әкімінің баспасөз қызметі.
Елорда мэрі бейберекет сауда қала тұрғындарының наразылығын тудырып жүрген мәселелердің бірі екендігіне тоқталды. Атап айтқанда, мұндай келеңсіздік «Артем» сауда орталығының маңында көптеп кездеседі. Бұл жердегі сауда нүктелерінің иелері адамдарды арзан бағамен қызықтырып, олардың қауіпсіздігі мен санитарлық жағдайларды сақтай бермейді.
– Бұған жол беруге болмайды. Мұндай дүңгіршектер қаланың барлық аудандарында кездеседі. Осыған жауапты құрылымдардың басшыларына ескертемін. Бұл жұмыс кешенді әрі жүйелі түрде жүргізілуі тиіс, ешкімнің өз міндетін өзгеге жүктеуге қақысы жоқ. Мен бұл жағдайды өз бақылауыма аламын, – деп атап өтті әкім.
Әкім өзінің орынбасары Нұрәлі Әлиевке тиісті мемлекеттік органдармен бірлесіп, бұрыш-бұрыштағы бейберекет сауданы жою жөніндегі іс-шаралар жоспарын әзірлеуді тапсырды.
Талқыланған тағы бір мәселе – құрылыс нысандарының ахуалы. Әкім құрылыс алаңдары қоршауларының ластығын, майысқан, сынған жерлерінің көптігін айтып, жыртылған баннерлер, тіпті кей жерлерде олардың орнының бос тұруы көшенің сиқын кетіретіндігін тілге тиек етті.
– Құрылыс алаңдары қауіпті нысан болып табылады, сондықтан, жұмыс басталмай тұрып қоршалуы тиіс. Қоршаулардың сыртқы көрінісіне, материалына және құрылысына қойылатын белгілі талаптар бар. Мемлекеттік сәулет-құрылыс бақылау басқармасына екі апта ішінде барлық құрылыс нысандары қоршауларын қалпына келтіріп, брендтеуін тапсырамын, – деді елорда басшысы.
Жиын барысында қала басшысы елордада басталған экологиялық айлық туралы еске салып, жалпы қалалық сенбілікке шаһар тұрғындарының барлығы қатысуы керек екенін атап өтті. Бұл ретте сайлау учаскелеріне, тұрғын алаптарына, қала маңындағы аймақтарға және базарларға жақын аумақтарды тазалау мен абаттандыруға ерекше көңіл бөлу керек екені баса айтылды.
