Ербол БЕЙІЛХАН, ақын:
– Отбасымызбен үнемі Бурабай мен Зеренді, Ерейменнің әсем жерлерінде дем алуды дәстүрге айналдырғанбыз. Өткен жылы Монғолиядағы Байөлке аймағына демалып келдім. Ондағы туыс-туғандарды, ел-жерді аралап қайттым. Керемет демалғанымды жасырмаймын, сенесіз бе, тоғыз күнде маған жиырма қой сойыпты. Ет пен сары қымыздан есім шықты. Ал, биыл Қытай еліндегі қандастарыма кетіп барамын. Өр Алтай да – өз жеріміз. Алтайда бабаларымның басы жатыр. Барып құран оқытып, бет сипап қайту – перзенттік парызымыз. Жалпы, «Өлі разы болмай, тірі байымайды» деген аталы сөзді қатты ұстанатын адамның бірімін.
Гаухар ЖҮСІПОВА, Қ.Қуанышбаев атындағы мемлекеттік академиялық Қазақ музыкалық-драма театрының әртісі:
– Шетелге жиі шығамын деп айта алмаймын. Өйткені, онда демалу үшін қаражатым жеткіліксіз. Жаз мезгілінде өз елімнің табиғаты әсем, көрікті жерлеріне саяхатқа шығамын. Өзім – екінші Швейцария саналатын Көкшенің қызымын. Сәкен Сейфуллин «Сексен көл Көкшетаудың саясында, Әрқайсы алтын кесе аясында, Ауасы дертке дауа, жұпар иісі, Көкірек қанша жұтса тоясың ба?» деп жырлағандай, Көкшенің Бурабай, Зеренді, Шалқар сияқты көлдеріне жиі барамын. Әрине, ақшам көп болса шетелге де барғым келеді. Бірақ, елордалықтарға Қазақстанның Баянауыл, Жайық, Балқаш секілді демалыс орындарына барып, отандық туризмді дамытуға үлес қосуға кеңес беремін.
Жайна СЕЙДАХМЕТОВА, студент:
– Отбасымызбен шетелге жиі шығамыз. Әсіресе, Тайландта демалған ұнайды, өйткені, онда көп нәрсе арзан. Алайда, жолақысы қымбатқа түсуі мүмкін. Мәселен, Түркияға сапар шегу үшін 127 мың теңге кетсе, Тайландқа 273 мыңдай кетеді. Бірақ, Астанадағы туған-туыстардың көбі Бурабайға барып, демалғанды тәуір көреді.
