КӘМЕЛЕТКЕ ТОЛДЫҢ БА, КӘСІП ІЗДЕП КӨРДІҢ БЕ?
Жазғы демалыста мектеп оқушылары мен студенттер бос жүрмей, жұмысқа орналасудың қамына кіріседі. Алайда аяқталған оқуды куәландыратын дипломның жоқтығынан жұмыс оңайлықпен табыла қоймайды. Ал, жастар уақытын тиімді ұйымдастыру мақсатында жүзеге асып жатқан игі жобалар жоқ емес. Тек оны көпшілігі біле бермейді. Соның бірі – «Жастарға арналған қоғамдық жұмыс» бағдарламасы.
Қала әкімдігінің қолдауымен Жұмыспен қамту және әлеуметтік бағдарламалар басқармасы осы шараны жыл сайын өткізіп келеді. Әсіресе, жаз айларында белсенділік ерекше артатын көрінеді. Тарқатып айтар болсақ, ұйымдастырушылар байланыс орнатқан органдар арқылы жұмыс іздеушілерді мемлекеттік қызметке орналастырады. Әкімдік бөлген бюджет арқылы 26500 теңге көлеміндегі жалақысын да өздері төлейді. Ал жұмыс уақыты – күніне 4 сағат. «Олар волонтер, курьер сияқты қоғамдық жұмыстарға жұмылдырылады. Ардагерлер кеңесіне де қуана-қуана сұранып жатыр жастарымыз. Қазірдің өзінде 107 адамды жұмысқа тұрғыздық, әлі 450 бос орын бар. Мұндай мүмкіндікті 16 жастан бастап пайдалануға болады. Өйткені, банкте есепшот ашу үшін жеке куәлік болуы керек. Сондай-ақ, зейнетақы қорына да ақша түсіп тұрады. Жеке куәлік, оқу орны мен мекен-жай анықтамасы, кәмелетке толмағандардың ата-анасынан жазбаша рұқсат талап етіледі» дейді басқарма басшысының орынбасары Ольга Юрьевна. Бағдарлама бойынша 6 ай бойы жұмыс істеуге болады. Оқу уақыты ескеріледі. Яғни, екеуінің бір-біріне кедергі болмауы – басты назарда.
Мәдина ЖАҚЫП