Bügıngı taŋda Astana qalasy äkımdıgınıŋ bır ǧana №1 psihologiialyq-pedagogikalyq tüzeu kabinetınde soŋǧy 10 jyl ışınde 5 myŋnan astam bala memlekettık qyzmetpen qamtamasyz etılgen. Qazırgı taŋda olar qalanyŋ jalpy bılım beru ūiymdarynda bılım aluda. Alaida ata-analar qalada osyndai tüzeu ūiymdary bar ekenın jäne olardyŋ qyzmetı turaly köp bıle bermeidı. Osy oraida atalǧan mekeme keşe mümkındıgı şekteulı balalarǧa arnalǧan «Jürekpen sezınu» festivalın ötkızdı.
M.Ötemısūly atyndaǧy Oquşylar saraiy maŋyndaǧy Arbat demalys alaŋynda ūiymdastyrylǧan ıs-şaraǧa Bılım ministrlıgı, Almaty qalasy Arnaiy jäne inkliuzivtı bılım berudı damytudyŋ ūlttyq ǧylymi-praktikalyq ortalyǧy, Astana qalasy Bılım basqarmasy, Saryarqa audany äkımdıgı ökılderı, demeuşı ūiymdar, sondai-aq mümkındıgı şekteulı balalar men olardyŋ otbasylary qatysty.
– Mümkındıgı şekteulı balalardy äleumettık beiımdeu jäne integrasiialau festivalın ötkızu arqyly qoǧamnyŋ nazaryn mümkındıgı şekteulı balalardyŋ mäselelerı men müddelerıne audaru közdelıp otyr. Sonymen qatar būl ıs-şarany ötkızudegı taǧy bır sübelı sebep – elordadaǧy osy «№1 psihologiialyq-pedagogikalyq tüzeu kabinetı» KMM qūrylǧanyna biyl 10 jyl toluy. Būl mekeme Astana qalasy äkımınıŋ qaulysymen 2013 jyly aşylyp, 0-18 jas aralyǧyndaǧy mümkındıgı şekteulı balalarǧa psihologiialyq-pedagogikalyq kömek körsetetın alǧaşqy memlekettık ūiymdardyŋ bırı boldy. Sodan berı qanşama erekşe balanyŋ damuyna yqpal etıp, olardyŋ ata-analarynyŋ janyna jalau bolyp keledı, – dedı bılım basqarmasy basşysynyŋ orynbasary Marjan Qaiyrbekova.
Festival barysynda mügedek balalardyŋ otbasylary men qala tūrǧyndary ärtürlı sala mamandarynan, atap aitqanda, surdopedagog, pedagog-psiholog, tiflopedagog, logoped, defektologtan balalardy erte jastan oŋaltu mümkındıgı turaly käsıbi keŋes aldy.
Qalanyŋ arnaiy bılım beru ūiymdarynyŋ qatysuymen balalardy tüzetu-damytu prosesınde qoldanylatyn oqu-ädıstemelık qūraldar men innovasiialyq jabdyqtardyŋ körmesı ūiymdastyryldy. Sondai-aq qolönerşıler, suretşıler, animatorlar oiyn-sauyq jäne tanymdyq baǧdarlamalar ūsynyp, festivaldıŋ joǧary deŋgeide ötuıne atsalysty. Erekşe qajettılıkterı bar balalar ärtürlı baǧyttaǧy şeberlık sabaqtaryna qatysuǧa mümkındık aldy. Sondai-aq balalardyŋ aqyl-oiy men fizikalyq damuyna yqpal etetın, asyqpen jäne neirogimnastikalyq jattyǧulardy oryndaityn ūlttyq oiyndar ötkızıldı. Tırek-qozǧalys apparatynda aqauy bar adamdarǧa beiımdeletın sporttyq qūral-jabdyqtar körsetıldı. Jalpy ıs-şaraǧa maqsatty toptaǧy 2000-nan astam balalar men ata-analar qatysty.
