Astana qalasy mektepterınıŋ oquşylary arasynda «Astana ūlandarynyŋ dauysy» I qalalyq baiqauy öttı.
Elımızde kenjelep qalǧan balalar önerınıŋ damuyna jaŋa tynys berıp, töl önerımızdıŋ damuyna üles qosu maqsatynda ūiymdastyrylǧan baiqau tört atalymǧa bölındı. Būl – «Estradalyq baǧyttaǧy oryndauşylar», «Dästürlı baǧyttaǧy oryndauşylar», «Vokaldy toptar» jäne «Terme-tolǧaular oryndauşylar».
Baiqauǧa qaladaǧy 40-tan astam mektepten 7-17 jas aralyǧyndaǧy 70-ke juyq oquşy qatysty. Olar ūstaz, sazger Käkım Erdıbaitegınıŋ än-terme, tolǧaularyn oryndady.
– Mūndai baiqau alǧaş ret ötıp jatyr. Jazǧan änıŋ ne küiıŋ sahnada oryndalsa, ıştei quanasyŋ. Al körermennıŋ jüregınen oryn tapsa, eldıŋ igılıgıne jarap jatsa, şyǧarmaşylyq adamy üşın odan ülken baqyt joq dep esepteimın. Jalpy, balalardyŋ ışkı jan düniesı taza bolyp ösuı kerek. Maǧjan Jūmabaev aitqandai, bala än üirenıp, öleŋ jattap, suret salyp össe, ışkı jan düniesı de baii tüsedı, – dedı sazger Käkım Erdıbaitegı.
Qazylar alqasynyŋ müşesı Maqsat Hamzinnıŋ aituynşa, mūnda önerpazdyŋ ana tılınde, iaǧni qazaq tılınde taza aituyna, dauys diapazonyna, sözdıŋ diksiiasyna, kiım kiısıne asa män berıldı.
– Baiqaǧanyŋyzdai, būlar kışkentai balalar ǧoi. Mäselen, bıreuı qylyǧymen tättı bolady, al endı bıreuınıŋ dauys mümkındıgı bar. Solardyŋ barlyǧyn jıtı eskerıp otyrmyz, – dedı ol.
Sabina KÄKIMJAN
