«ALTYN DOMBYRA» İEGERI BÜGIN ANYQTALADY
Keşe Kongress holda Täuelsızdık künıne arnalǧan «Mäŋgılık el – mūratym» atty respublikalyq aqyndar aitysy bastaldy. Bas jüldege «Altyn dombyra» tıgıletın osyndai aitys üşınşı märte ūiymdastyryldy. Aitysker aqyndardyŋ būl jolǧy dodasyn da «Nūr Otan» partiiasynyŋ qoldauymen Mädeniet jäne sport ministrlıgı ötkızıp otyr.
Memleket jäne qoǧam qairatkerı, «Qorqyt ata» ǧylymi-zertteu ortalyǧynyŋ direktory Myrzatai Joldasbekov, Qazaqstannyŋ halyq ärtısı Asanälı Äşımov, Parlament Mäjılısınıŋ deputaty Orazkül Asanǧazy, QR Ūlttyq sport türlerı qauymdastyǧynyŋ prezidentı Bekbolat Tıleuhan, «Ara» saiasi-qoǧamdyq jurnalynyŋ bas redaktory, satirik Köpen Ämırbek, «Qazaqstan Respublikasy ardagerler ūiymy» RQB Ortalyq keŋesınıŋ töraǧasy Ömırzaq Ozǧanbaev jäne aitysker aqyn Mūhamedjan Tazabek qazylyq etıp otyrǧan aitysqa elımızdıŋ tükpır-tükpırınen kelgen 22 aqyn qatysuda.
Olardyŋ arasynda «aitystyŋ killerı» atanǧan Bekarys Şoibekov, tūrǧylastary «Asan qaiǧy» atap ketken Aibek Qaliev, Balǧynbek İmaşev, Ainūr Tūrsynbaeva, Sara Toqtamysova syndy aityssüier qauymǧa jaqsy tanys esımder bar. Sondai-aq, aitys sahnasynan köpten körınbei ketken maŋǧystaulyq Nūrlan Mūsaev ta söz dodasyna şiyrşyq atyp kelıptı.
Esterıŋızge sala keteiık, «Altyn dombyranyŋ» alǧaşqy iegerı qyzylordalyq Mūhtar Niiazov boldy. Byltyr ol Jandarbek Būlǧaqovtyŋ qolyna tidı. Biylǧy jeŋımpaz bügın anyqtalady. Aitystyŋ qorytyndysyn gazetımızdıŋ kelesı sanynda jariialaityn bolamyz.
Amanǧali ŞMİTŪLY