Astanadan auylǧa deiın…
Astana
Astanaǧa gaz qūbyryn tartu biylǧy jeltoqsan aiynda bastalady. «Saryarqa» magistraldı gaz qūbyrynyŋ «Qyzylorda–Jezqazǧan–Qaraǧandy–Temırtau–Astana» baǧyty boiynşa bırınşı kezeŋı 2019 jyldyŋ jeltoqsan aiyna deiın aiaqtalady.
Almaty oblysy
Jetısu öŋırınıŋ Būrhan, Şeŋgeldı, Qyrǧauyldy qorymdaryndaǧy arheologiialyq qazba jūmystary barysynda tabylǧan, temır däuırıne tiesılı jüzge tarta köne zat pen būiymnyŋ arasynda keramikalyq ydystar, jebenıŋ qoladan jasalǧan ūştary jäne altyn äşekeiler muzeige tabystaldy. Endı olar M.Tynyşpaev atyndaǧy oblystyq tarihi-ölketanu mūrajaiynda saqtalady.
Batys Qazaqstan oblysy
Oblystyq auruhana janynan «Allergologiia ortalyǧy» aşyldy. Mūnda 50-den asa allergendı tekserıp, syrqat syryn tap basuǧa mümkındık bar. Endı türlı allergiiasy bar nauqastar bır jerden diagnostikadan ötıp, bılıktı mamandardyŋ järdemıne jügıne alatyn bolady.
Atyrau oblysy
Atyrauda avstriialyq «Borealis» kompaniiasy gaz-himiialyq käsıpornyn aşady. Būl jönınde Briusselde ötken qazaqstandyq-europalyq biznes-forumda şeşım qabyldandy.
Pavlodar oblysy
Oblys ortalyǧynda kelesı jyldan bastap qoǧamdyq kölıkte elektrondy bilet jüiesı engızıledı. Pavlodar Astana jäne Almatydan keiıngı qoǧamdyq kölık qyzmetın jetıldıruge kırısken üşınşı qala bolady. Bırınşı kezekte elektrondy biletteu jüiesı avtobus marşruttaryna, sodan keiın bırte-bırte tramvailarda da ornatylady.
Türkıstan oblysy
Maqtaaral audanynda jaŋadan salynǧan asfalt-beton zauyty ıske qosyldy. İnvestisiianyŋ jalpy qūny 300 mln teŋgenı qūraidy. Aldaǧy uaqytta daiyn önım Qazaqstan boiynşa satylady dep josparlanyp otyr.
Şyǧys Qazaqstan oblysy
Bügınde Semei qalasy boiynşa 67 mektep bolsa, sonyŋ tek 9-yna ǧana ūlt tūlǧalarynyŋ esımı berılgen eken. Endı būǧan deiın nömırmen atalyp kelgen 8 mektep Abai, M.Äuezov, Q.Sätpaev, B.Momyşūly, Y.Altynsarin, Ä.Bökeihanūly, A.Baitūrsynov jäne pedagog T.Qūtjanov esımımen atalatyn bolady.
Qaraǧandy oblysy
Qaraǧandyda Būqar jyraudyŋ 350 jyldyǧyna arnalǧan «Būqar jyraudyŋ ömırı men şyǧarmaşylyǧy – bügıngı qoǧamnyŋ ruhani qūndylyǧy» atty halyqaralyq ǧylymi-täjıribelık konferensiia öttı. Jiyn aiasynda «Kömekei äulie» atty derektı filmnıŋ tūsaukeserı ūiymdastyryldy.