Keiıngı kezde №1 qalalyq emhana jabylady degen söz taralyp kettı. Bas-aiaǧy 46 myŋǧa juyq tūrǧynǧa medisinalyq qyzmet körsetetın mekeme şynymen jabylsa, qaida baryp qaralamyz dep tūrǧyndar alaŋdap jür. Mäselenıŋ män-jaiyn bız de bılgen edık.
Astana qalasynyŋ tūrǧyndary kün saiyn köbeiıp keledı. Bügınde köptegen emhanalar artyq jüktememen jūmys ısteidı. Bardyŋ özın äreŋ jetkızıp jatqanda, bır emhanany jabu aqylǧa syimaidy. Būl oiymyz rasqa şyqty. №1 qalalyq emhananyŋ bas därıgerı Küljan Anasovanyŋ aituynşa, būl emhana jabylmaidy. Jūrttyŋ dürlıgıp jürgenı – keibır uchaskelık terapevter Äuezov köşesı, 24-meken-jaiynda ornalasqan 1-ınşı qalalyq balalar emhanasynyŋ ǧimaratyna auystyrylǧan eken. «Būl da bızge qarasty emhana. Ǧimarattyŋ bır bölıgın tiımdı paidalanudy ärı tūrǧyndarǧa keŋ kölemde qyzmet körsetu üşın osyndai şeşım qabyldadyq. Bır jaǧynan, bızdıŋ emhana – alpysynşy jyldary salynǧan baiyrǧy ǧimarat. Jöndeu jūmystaryn jürgızudı de oilastyryp otyrmyz» deidı bas därıger.
Materialdyq-tehnikalyq bazasy men kadrlyq ūjymyn äbden qalyptastyrǧan būl mekeme emdeu-diagnostikalyq kömektı 20 sala boiynşa jürgızedı. Mūnda ekı auysymmen jūmys ısteitın kündızgı stasionar jūmys ısteidı. Bır jyldyŋ ışınde emhanaǧa kelıp-ketuşılerdıŋ sany 350 myŋǧa jetken.
