Älemdegı ärbır halyqtyŋ betkeūstar tūlǧalary men daŋqty batyrlary bolady. Olar el basyna ekıtalai kün tuyp, qiyndyqtarǧa tap bolǧanda, köptıŋ ışınen suyrylyp şyǧyp, otqa da, suǧa da tüsedı. Qan tögıp, jan beruge bel bailaidy. Qazaqtan şyqqan osyndai tūlpar mınıp, tu ūstaǧan batyrlardyŋ bırı jäne bıregeiı – Bauyrjan Momyşūly.
Astanada daŋqty qolbasşy turaly «Bauyrjan Momyşūly» filmınıŋ tūsaukeserı ötıp, bırınşı seriiasy körsetıldı. Filmde äskeri qyzmettegı jıgerlı jıgıt Bauyrjannyŋ soǧys bastalysymen otanyn qorǧauǧa attansam degen armany, general Panfilovpen tanysuy, qolyndaǧy küregı men qalamsabyn qaruǧa almastyrǧan azamattyŋ qan maidanǧa daiyndyǧy jäne batalon komandirı retındegı alǧaşqy şaiqasy taspalanǧan. Is-şara barysynda köpşılık daŋqty tūlǧanyŋ aşyq ta jarqyn öz dauysyn estıp, ruhtanyp qaldy.
Aty aŋyzǧa ainalǧan qaharman jaily tarihi filmdı tüsıru ideiasy «Habar» agenttıgıne tiesılı. Bastama avtorlary būl jobany jüzege asyrudy tanymal rejisser Aqan Sataevqa senıp tapsyrǧan eken. Siujet negızıne jazuşy Aleksandr Bektıŋ äigılı «Volokolamsk tas joly» povesı alynǧan. Kinonyŋ tüsıru jūmystary Talǧarda jäne Minskıde jürgızıldı. Baiqaǧanymyz, şyǧarmaşylyq top Bauyrjan Momyşūlynyŋ ömır jolyna arqau bolǧan tört seriialy filmdı aqiqattan barynşa auytqymai tüsırgen. Rejisser ūlttyq batyrymyzdyŋ bar bolmysyn beruge tyrysqan. Basty rölde M.Äuezov atyndaǧy Qazaq memlekettık akademiialyq drama teatrdyŋ ärtısı Erkebūlan Daiyrov oinaidy. Jiyrma segız jastaǧy Erkebūlan serialǧa bailanysty ırıkteu synynda-aq şyǧarmaşylyq top jetekşılerı onyŋ bahadür qolbasşyǧa ūqsaityndyǧyn aŋǧarǧan. Özınıŋ aituynşa, akter Momyşūlymen ūqsastyǧy turaly būryn eşqaşan oilanbaǧan körınedı. «Şynymdy aitsam, rölge bekıtılgen soŋ, Baukeŋnıŋ şyǧarmalaryn jan-jaqty zerdelei oqydym. Ondaǧy maqsatym, ekranda kımnıŋ beinesın jasap otyrǧanymdy tereŋ tüsınu edı. Tüiındei kelıp qorytqan oiym, qazaqta osyndai dara azamattyŋ bolǧanyna maqtanuymyz kerek. Keiıngı ūrpaq Bauyrjannyŋ boiyndaǧy batyrlyqty, batyldyqty ūltyn süigen, tılın qadırlegen qasietın boilaryna darytsa eken degen nietpen batyr beinesın körsetuge bar küş-jıgerımdı jūmsadym» deidı bızben äŋgımesınde.
Bauyrjan Momyşūlynyŋ jūbaiy Jamaldyŋ obrazynda Äsel Saǧatova oinaidy. «Bauyrjan atamyzdyŋ jūbaiyn kinoda keiıpteu – men üşın ülken märtebe. Ol kısı erekşe adam bolǧan. Onyŋ otbasy turaly ädebiette az jazylady. Sondyqtan, ol kısı jaiynda jaqsyraq bılu üşın kelını Zeinep apamen kezdesıp, köp mälımetter aldym. Osyndai erekşe adammen tıze qosyp ömır sürgenıne qaraǧanda, menıŋ keiıpkerım – öte aqyldy äiel» deidı Äsel. Al filmdegı general Panfilov rölı Viktor Aşaninge, leitenant Qasenov rölı Saiat Esembaevqa būiyrǧan. Sondai-aq, Maqsat Säbitov, Baqtiiar Qoja, Asylhan Tölepov, Dmitrii Skirta syndy ärtıster de tüsken.
Kinotuyndynyŋ premerasy sättı öttı. Körermender köŋılderı tolqyp, erekşe äserge bölengenderın jarysa jetkızıp jatty. Elı süigen erdıŋ ömırı men qan maidandaǧy erlıgın baiandaityn serial 17 jeltoqsannan bastap, «Habar» arnasynan körsetıletın bolady. Tarihi filmnıŋ körermenge ūnaityndyǧyna şyǧarmaşylyq toptyŋ eş kümänı joq. Öitkenı, künı keşe ǧalamtor jelısınde jariialanǧan telehikaianyŋ resmi treilerınıŋ özı myŋnan astam körermen jinap ülgergen.
Erkejan SÄTIMBEK
