Astana qalasy medisinasynyŋ jetıstıkterı az emes. Bügınde medisinanyŋ eŋ myqty zamanaui qūrylǧylary elordada. Bas qalada eŋbek etıp jürgen aqhalattylardyŋ ışınde alǧysqa bölenıp, bılıktılıgımen bıregei tabystarǧa jetkenderı jeterlık. Endeşe, medisina qyzmetkerlerınıŋ künı qarsaŋynda elordalyq densaulyq saqtau jüiesınıŋ igı qadamdary jönınde aitudy jön kördık.
Elorda medisinasynyŋ tabysy degende, eŋ bırınşı oiǧa oralatyny – jaŋadan aşylyp jatqan ǧimarattar. Osy mekemelerdıŋ bärın qosqanda, bügınde Astanada 37 medisinalyq ūiym bar. Onyŋ 14-ı – stasionar. 14-ı – ambulatorlyq ūiymdar jäne 9-y – basqa da medisinalyq mekemeler. Soŋǧysynyŋ qatarynda jedel medisinalyq kömek stansasy men Medisinalyq kolledj, SPİD ortalyǧy, Patologoanatomiialyq biuro bar.
Byltyr medisinalyq kömektı tūrǧyndarǧa barynşa qoljetımdı etu, densaulyq salasynyŋ sapasyn arttyru, emhanalardyŋ jüktemesın azaitu baǧytynda bırtalai jūmystar atqaryldy. Jaŋa medisinalyq ūiymdardyŋ köptep aşylǧany da – osy tūs. Aitalyq, Dosmūhamedūly köşesınde bır mezgılde 150 adamǧa qyzmet körsetetın alǧaşqy medisinalyq-ambulatoriialyq kömek ortalyǧy paidalanuǧa berıldı. «Grand Astana» tūrǧyn üi keşenınen elorda äkımdıgı 1500 şarşy metr ǧimarat bölıp alyp, būl №6 qalalyq emhanaǧa berıldı. №1 Perinataldyq ortalyq pen №2 balalar auruhanasy bazasyndaǧy «Niet» pen «Şipager» otbasylyq densaulyq ortalyǧyna jeke märtebe berılıp, olar bölek ūiym retınde tūrǧyndarǧa qyzmet körsete bastady.
Aldaǧy uaqytta aşylatyn nysandar da barşylyq. Jaqynda alǧaşqy medisinalyq-sanitarlyq kömek körsetetın ekı nysannyŋ qūrylysyn aiaqtau közdelıp otyr. Onyŋ bırı – Ürker kentındegı 150 oryndyq emhanalyq keşen bolsa, ekınşısı – Esıldıŋ sol jaǧalauyndaǧy bır mezgılde 500 adam qabyldai alatyn emhana. Būǧan qosa, 250 orynǧa şaqtalǧan balalar infeksiialyq auruhanasy, emhanasy bar 250 oryndyq medisinalyq-äleumettık beiımdeu ortalyǧy, emdeu-öndırıstık şeberhanalardy ıske qosu josparlanuda.
Astanalyq medisina ūjymy auru meŋdegen jandardyŋ ömır sapasyn jaqsartu üşın de bırtalai şarualardyŋ basyn qaiyrdy. Aitalyq, Giustava Russi atyndaǧy belgılı Onkologiia ortalyǧymen bırlesıp, ısık aurularyna şaldyqqan adamdarǧa jasalatyn himiiaterapiianyŋ qauıpsızdıgın arttyryp, tiımdılıgın jaqsartu üşın arnaiy innovasiialyq jobanyŋ tūsauyn kestı. №1 perinataldyq ortalyqta endokrinologiialyq syrqattarǧa şaldyqqan jüktı äielderdıŋ aman-esen bosanuyna mümkındık beretın ortalyqtandyrylǧan tekseru komissiiasy qūryldy. Bügınge deiın osynda 819 jüktı äiel tekserılıp, 57-sınde ärtürlı aurular anyqtalyp, jedel türde auruhanaǧa jatqyzylǧan.
Jürek aurularyna şaldyqqan tūrǧyndardyŋ da densaulyǧyn tüzeu üşın №1 qalalyq auruhana bazasynda İnsult ortalyǧy jūmys ıstep keledı. Mūnda 1060 pasient emdelıp şyqqan. 223 operasiia jasalsa, onyŋ 120-sy jedel jaǧdaida, 99-y josparly türde ötken.
Elordalyq kışkentai tūrǧyndardyŋ densaulyǧy da nazardan tys qalmai, balalarǧa sapaly medisinalyq kömek körsetu üşın 15 şeberlık därısı ötkızılgen eken. Osy boiynşa AQŞ, Fransiia, Ūlybritaniia, Litva, Resei elderınde 240-tan asa medisinalyq mamandar bılıktılık kursynan ötıp, olar 45 bırlesken ota jasaǧan. Balalardyŋ densaulyǧyna bailanysty 400-den asa keŋester berılgen.
Būl elordanyŋ 2014-2015 jyldardaǧy jetıstıkterı ǧana. Alda astanalyq aqhalattylar būdan da ülken jetıstıkterge jetetınıne senım mol.
