Almatyda ötken älem chempionatynda Qazaqstan auyr atletterı 3 altyn, 2 kümıs medal jeŋıp alyp, jalpykomandalyq esepte üşınşı orynǧa taban tıredı. Qazaqtyŋ kök bairaǧyn üş märte biıkke kötergen Zülfiia Chinşanlo, Jasūlan Qydyrbaev jäne İlia İlin syndy saŋlaqtar el mereiın tasytty. Vladimir Sedov pen Jazira Japparqūl kümıs jüldege qol jetkızdı.
ZÜLFİIа BASTADY!
Qazaqtyŋ namysy üşın aianbaǧan qarşadai qyz būl joly da osydan ekı jyl būryn London oiyndarynda körsetken salqynqandylyǧyn taǧy bır körsettı. Zıltemırdı köteruge şyqqan saiyn eşqandai artyq emosiiaǧa berılmedı. Köŋılınıŋ küiın qarsylastaryna bıldırmedı. Şyqqan saiyn jäne ölşenıp berılgen salmaqty basynan asyryp kötere berdı. Osylaişa biylǧy Aziia oiyndarynda aldyn orap ketken qytailyq Siu Şuszinnen esesın qaitaryp, üşınşı märte älem chempiony ataǧyn jeŋıp aldy. Ol ol ma, Zülfiia Almaty törınde serpe köterude ekı ret qatarynan älem rekordyn jaŋartty. 133 kelını köterıp älemdık rekordty bır jaŋartsa, arada ekı minut ötkende öz rekordyn taǧy bır özgertıp tastady. Būl joly 134 kelını baǧyndyrdy.
– Endıgı maqsatym qossaiysta älem rekordyn jaŋartsam deimın. Qazır būl körsetkış 233 kelı bolyp tūr. Al, men bolsam osyǧan deiın 232 kelını kötergen bolatynmyn. Būl maqsatyma Rio-de-Janeiro oiyndarynda jetemın dep oilaimyn, – dedı Almatydaǧy älem chempionatynda alǧaşqy altyndy alǧan Zülfiia Chinşanlo.
JASŪLAN QOLDADY!
Qazaqstan jerınde tūŋǧyş ret ūiymdastyrylǧan älem chempionatynyŋ este saqtalatyn eŋ aişyqty sätınıŋ bırı dep Jasūlan Qydyrbaevtyŋ jeŋısın aituǧa bolady. Būl şyn mänınde qazaq balasynyŋ älemdık auyr atletikanyŋ asqar şyŋyn baǧyndyrǧan, iaǧni, älem chempiony ataǧyna ie bolǧan tarihi sätı edı. Jaqynda ǧana jiyrma ekı jasqa tolǧan, ömırınde tūŋǧyş ret älem dodasyna tüsken jas jıgıt 94 kelı salmaqta top jardy.
Ol jūlqa köterude 179 kelı salmaqty köterıp tek üşınşı orynmen şektelgen edı. Alaida, özın asa qyzu qoldaǧan janküierlerı aldynda namysqa qamşyny basqany sonşalyq serpe köterude aldyna jan salmady. 229 kelını basynan bır-aq asyrdy. Söitıp, qossaiystyŋ qorytyndysynda barlyq qarsylastaryn qapyda qaldyryp kettı. 408 kelı köterıp, älem chempiony ataǧyn jeŋıp aldy. Osy topta taǧy bır qazaqstandyq Vladimir Sedov kümıs jüldeger atandy. Üşınşı orynǧa ataqty latyş atletı Aurimas Didjvalis taban tıredı.
– Soŋǧy ekı jylda ülken sportta bolǧan joqpyn (2011 jyly dopingke qatysy bar degen aiyppen ekı jylǧa jarystardan şettetılgen bolatyn. Ǧ.Q.). Endı oraldym. Aldaǧy uaqytta da Qazaqstannyŋ ataǧyn şyǧara beremın, – deidı altyn medal iegerı Jasūlan Qydyrbaev.
İLIа ŞYRQADY!
Şynyn aitu kerek, İlia İlinnıŋ saiysqa tüsetın sätın barşa qazaqstandyqtar taǧatsyzdana küttı. Olimp şyŋyna ekı ret köterılgen, älem chempiony ataǧyn üş märte jeŋıp alǧan ataqty jerlesımız London oiyndarynan keiın dübırlı dodaǧa tüspei jürgen. Onyŋ üstıne auyrlau salmaqqa auysqany belgılı edı. Köptegen janküierlerdıŋ «Altyn balanyŋ» jaŋa salmaqtaǧy jaǧdaiy qalai bolar eken» degen küptı köŋılmen jürgenderın nesıne jasyramyz. «94 pen 105 kelınıŋ aiyrmasy aitarlyqtai bolady. İlinge būl joly oŋai bolmaidy» degender de jetkılıktı edı.
Al, endı, sol küptı köŋılderdı seiıltken, qalyŋ elın jeŋısımen serpıltken İlin rekordyna toqtalaiyq.
İlin osy älem bırınşılıgınde 105 kelıge deiıngı salmaqta synǧa tüsken saiypqyrandar arasynda «qazaqstandyq vunderkind» öz myqtylyǧyn taǧy da däleldep şyqty. Olimpiada oiyndarynyŋ jüldegerlerı, älem jäne qūrlyq chempiondary taitalasqa tüsken dübırlı dodada jerlesımız naǧyz tolaǧai ekenın, şyn jüirıkke tūsau bolmaitynyn törtkül düniege paş ettı. Osy salmaqtyŋ köşbasşylary sanalyp jürgen, älemdık jarystyŋ jeŋımpazdary özbekstandyq Ruslan Nuridinov pen reseilık David Bedjanian bastaryn şaiqaumen boldy. Olai deitınımız, osy jarys üstınde serpe köterude Nuridinov älem rekordyn jaŋartyp jıberdı. Osy sätte «Menıŋ rekordymdy jaŋartqan qaisyŋ…» degendei Bedjanian da qaharyna mıngendei boldy. Ol bır minut būryn ornaǧan jaŋa rekordqa taǧy bır kelı qosyp, 240 kelı zıltemırdı basynan bır-aq asyryp, keŋ saraidy basyna kötere aiqailap jıberdı. Mūnysyn endı qaisyŋ bar degenı şyǧar dep ūqtyq ta, İlinımızdı küttık. Al onyŋ şegınetın jerı qalmaǧan edı. Soŋǧy mümkındıgı ǧana qalǧan. Älem chempiony bolu üşın 242 kelını köteru kerek. Būl jäne jaŋa rekord bolmaq.
Aitqandaiyn, İlin bapkerlerı 242 kelıge tapsyrys berdı. Baluan Şolaq saraiy sıltıdei tyndy. İlin ortaǧa ädettegıdei erkın ärı senımdı qadammen keldı de, köp müdırmei zıltemırdı keudesıne bır-aq köterdı, söittı de, keudesın kere demın tartty da, basynan asyryp jıberdı. Keŋ sarai ışı guıldep-uıldep kettı. «İlin – chempion!!!»
İlia jeŋıs tūǧyrynda tūryp Qazaqstan änūranyn şyrqaǧanda el bolyp tolqydyq. El bolyp marqaidyq.
Osylaişa, İlia İlin törtınşı märte älem chempiony ataǧyn jeŋıp aldy. Halyqaralyq auyr atletika federasiiasynyŋ şeşımımen älem chempionatynyŋ üzdık atletı atandy.
– Men osy jeŋısımdı Qazaqstan Prezidentıne jäne halqyma arnaimyn, – dep aǧynan jaryldy barşa qazaqstandyqtardy erekşe küşımen täntı etken İlia İlin.
Kelesı älem chempionaty Hiustonda ötetın bolady.
Ǧalym QOJABEKOV
