Mümkındıgı şekteulı jandar äleumettık tūrǧydan qalai qorǧaluda? Bas qalanyŋ atqaruşy organdary ol üşın ne ıstep jatyr? Astana qalalyq mäslihatynyŋ tūraqtykomissiialarynyŋ qoǧamdyq tyŋdauynda tiıstı basqarmalardyŋ basşylary būl tarapta esep berıp, mügedekter ūiymdarynyŋ jetekşılerı öz ūsynystary men talap-tılekterın jetkızdı.
Aldymen baiandama jasaǧan Jūmyspen qamtu, eŋbek jäne äleumettık qorǧau basqarmasynyŋ basşysy Ermek Ospanovtyŋ aituynşa, Astanada 23069 mügedek tırkelgen. Olardyŋ 4379-y – balalar. Mümkındıgı şekteulı jandardy oŋaltuǧa biyl 2 mlrd teŋgege juyq qarjy bölındı.
Būl qarajatqa jürıp-tūruy qiyn bırınşı top mügedekterıne körsetıletın jeke kömekşınıŋ äleumettık qyzmetı, mümkındıgı şekteulı jandardy arbalarmen, mındettı gigienalyq qūraldarmen, taǧy basqa kerek-jaraqtarmen qamtamasyz etu, ärtürlı medisinalyq kömek, mügedek balalardy üide oqytu qyzmetı, sondai-aq, mügedekterdı tasymaldaityn kölık qyzmetı (invataksi) kırıp otyr. Qalada qazır sondai qyzmettı 21 kölık körsetedı.
Mädeni, bılım beru, sport, densaulyq saqtau, käsıpkerlık nysandardyŋ mügedekterge qoljetımdılıgı baǧytynda jūmys jürgızılude. Bügıngı künge 1106 nysan pasporttaldy. Pandustar bolmaǧan jaǧdaida aiyppūl salynady. Qaladaǧy 749 avtobusqa mümkındıgı şekteulı jandar mınıp-tüse alatyndai qūrylǧy ornatyldy. «Astana – ruhy myqty adamdar qalasy» baǧdarlamasynan mügedekter tys qalyp kele jatqan joq.
Densaulyq saqtau basqarmasynyŋ basşysy Kamaljan Nadyrovtyŋ sözınşe, mügedekter tegın medisinalyq kömektıŋ kepıldendırılgen kölemı aiasynda diagnostikalyq tekserulerdıŋ tolyq kölemın alady. «Täuelsız ömır» DOS» qoǧamdyq bırlestıgınıŋ bas mamany Ardaq Otarbaev tabiǧi jolmen bala süie almaityn, arbaǧa taŋylǧan mügedekterge qoldan ūryqtandyruǧa mümkındık jasap, kvota böludı sūrady. Basqarma basşysy būǧan Astanada bır perzentke zar bolyp jürgen otbasylarǧa jylyna 50 kvota bölınetının, alaida tiıstı kezekte myŋdaǧan adam tūrǧanyn, kvota bölu kezınde adamnyŋ mügedek-mügedek emestıgı esepke alynbaitynyn, mūnda naqty medisinalyq körsetkışter men kezektılık röl oinaitynyn aitty.
Bılım basqarmasynyŋ basşysy Änuar Janǧozin qalada erekşe qajettılıgı bar balalarǧa arnaiy bılım beretın 42 mekeme qyzmet körsetetının, sūranys bolyp otyrǧandyqtan 2020 jyldyŋ soŋyna deiın taǧy osyndai 5 mekeme salu josparlanǧanyn jetkızdı. «Qazır Astanada jeke ǧimarattary bar 199 bılım beru ūiymynyŋ 187-sınde nemese 94 paiyzynda mümkındıgı şekteulı jandarǧa tiıstı jaǧdai jasalǧan. Qalǧan 12-sındegı kemşılıkterdı biyl tüzeimız» degen ol mügedek balalardy oqytatyn kadrlar, sonyŋ ışınde logopedter, defektologtar, basqa da osy siiaqty mamandar, jiyny 63 adam jetıspei jatqanyn aitty. Onyŋ aituynşa, gumanitarlyq kolledj bazasynda inkliuzivtı bılım beru boiynşa jaŋa mamandyqqa oqytu jüiesı engızılmek. Al bolaşaqta osy oqu orny negızınde universitet aşylmaq.
Käsıpkerlık jäne önerkäsıp basqarmasy basşysynyŋ orynbasary Ruslan Ydyrysov osy baǧytta mügedekterdı qoldau jūmysymen tanystyrdy. Tūrǧyn üi basqarmasynyŋ basşysy Ruslan Ahmetov memleket tarapynan berıletın baspana kezegınde 3 myŋǧa juyq I jäne II toptaǧy mügedekter jäne mügedek balalardy tärbielep jatqan 2 myŋǧa tarta otbasy tūrǧanyn baiandady. «Olarǧa äleumettık älsız toptar tarmaǧyndaǧy kezektılıktıŋ retı boiynşa päter berıledı.
I jäne II toptaǧy mügedekter baspana alǧan betten jekeşelendıre alady. Ol üşın tiıstı zaŋnama bar. Jalpy alǧanda, 2015-2017 jyldary mügedekterge 102 päter berıldı» dedı basqarma basşysy.
«Nasledie» qoǧamdyq bırlestıgınıŋ töraiymy Marjan Abdullina, Astana äkımınıŋ mügedekterdı äleumettık qorǧau mäselelerı jönındegı keŋesşısı Mūrat Äbdımomynov tüitkılderdı qozǧap, öz ūsynystary men talap-tılekterın jetkızdı. Qalalyq mäslihat deputaty İlia Meşeriakov mügedekterdıŋ bastamalaryn qoldau kerektıgıne nazar audardy.
Tyŋdau qorytyndysynda qalalyq mäslihattyŋ tūraqty komissiialarynyŋ müşelerı qala äkımdıgıne tiıstı ūsynystardy jıberdı.
Amanǧali QALJANOV
