Astanadaǧy «Jerūiyq» saiabaǧynda 1941 jyldyŋ küzınde aty aŋyzǧa ainalǧan qazaqstandyqtardyŋ erlıgı men batyr-panfilovşylardy eske alu räsımı öttı. Saltanatty şaraǧa elordalyq Qorǧanys ısterı jönındegı departamentı, Qaruly Küşterdıŋ ardagerlerı, auǧan soǧysy ardagerlerı, joǧary oqu oryndary äskeri kafedralarynyŋ studentterı men oqytuşylary qatysty.
Şarada «Öskeleŋ ūrpaq tarihty ūmytpauy kerek. Eŋ bastysy – jer betındegı beibıtşılıktı qorǧaǧan aty aŋyzǧa ainalǧan jerlesterdıŋ erlıgı ūmytylmauǧa tiıs» dep söz bastaǧan «Qaruly Küşter ardagerlerı» respublikalyq qoǧamdyq bırlestıgı töraǧasynyŋ orynbasary, otstavkadaǧy general-maior Marat Naǧūmanov panfilovşylardyŋ erlıgıne toqtaldy.
«1941 jyldyŋ qazan jäne qaraşa aiyndaǧy auyr qorǧanys şaiqastarynda qazaqstandyq diviziialar özıne jüktelgen mındetterdı abyroimen oryndady. Olar antalaǧan jaudy tejep, rezervter men oq-därılerdı, tehnika men auyr qaru-jaraqtardy tasymaldauǧa asa qajettı uaqyt ūtuǧa mümkındık berdı. Būl äskerlerdıŋ jeltoqsan aiynda jauǧa qarsy şabuyldy daiyndap, bastaudy qamtamasyz ettı. Bıraq şyǧyn da az bolmady. 50 km-den astam maidan şebınde qorǧanysty tabandylyqpen ūstaǧan 312-diviziia tolyǧymen qaza tapty. 1941 jyly 17 qaraşada 316-atqyştar diviziiasy Qyzyl Tu ordenımen marapattaldy; 18 qaraşada 316-atqyştar diviziiasyna 8-gvardiialyq atqyştar diviziiasy ataǧy berıldı; 18 qaraşada Gusenovo selosyndaǧy baqylau ornynda diviziia komandirı, general-maior İ.Panfilov qaza boldy. 1941 jyly 23 qaraşada 8-gvardiialyq atqyştar diviziiasy «general-maior İ.Panfilov atyndaǧy» qūrmettı ataǧyna ie boldy».
Gül qoiu räsımınen keiın ıs-şaraǧa qatysuşylar qaza bolǧan qazaqstandyq jauyngerlerdı bır minut ünsızdıkpen eske aldy.
