Qairat LAMA ŞARİF, Qazaqstan Respublikasy Dın ısterı agenttıgınıŋ Töraǧasy: DINİ EKSTREMİZM – AQİQAT DINNIŊ JAUY
Bügıngı taŋda dıni ekstremizm — Batys pen Şyǧystyŋ ülkendı-kışılı elderınıŋ basty mäselesı. Alaida, är eldıŋ qoǧamynda özındık erekşelıkter bar. Qazaqstandaǧy dıni ekstremizmnıŋ şynaiy kelbetı qandai? Onyŋ tüp tamyry qaida jatyr jäne onymen küresu joldary qaisy?
Osy jäne basqa saualdarǧa Qazaqstan Respublikasy Dın ısterı agenttıgınıŋ Töraǧasy Qairat Lama Şarif jauap beredı.
Būl jerdegı sebep — psihologiialyq tūraqsyzdyq
– Qairat Qaiyrbekūly, «Dıni ekstremizmnıŋ aldyn alu» jäne «dıni ekstremizmge qarsy küresu» ūǧymdarynyŋ araqatysy jönınde ne aitasyz? Olar täjıribede qalai jüzege asyp jatyr?
– Dın ısterı agenttıgı konfessiiaaralyq kelısımmen qamtamasyz etu, azamattardyŋ dıni senım erkındıgı qūqyn jäne dıni bırlestıktermen özara bailanys salalaryn, sondai-aq, atalmyş baǧyttaǧy salaaralyq üilestırude memlekettık strategiiany jüzege asyruşy ortalyq atqaruşy organ bolyp tabylady.
Tatulyq pen tūraqtylyq Qazaqstannyŋ ışkı saiasatynyŋ basty basymdyǧy jäne de respublikamyzdyŋ örlep, örkendeuınıŋ qajettı alǧyşarty bolyp tabylady, sondyqtan da memlekette olardy qamtamasyz etetın tūtastai bır jüie qalyptasqan. Osy jüiede agenttık özındık orynǧa ie.
Bügıngı dın sekıldı öte näzık saladaǧy tūraqtylyqqa töngen syn tegeurınder men qaterler ekstremizm türınde boi köterdı. İdeologiia, terıs piǧylǧa ündeu, iaki, laŋkestık äreketter arqyly dıni ekstremizm özıne jol salyp jatyr.
Söz joq, bız Qazaqstan Respublikasynyŋ «Ekstremizmge qarsy ıs-qimyl turaly» zaŋyna säikes dıni saladaǧy ekstremizmge toitarys berıp, ymyrasyz küresuge tiıspız. Osy zaŋǧa säikes, dıni ekstremizmmen küresu memlekettık organdardyŋ qyzmetıne jatady. Iаǧni, adam qūqylary men azamattardyŋ bostandyqtaryn, konstitusiia negızderın qorǧauǧa baǧyttalǧan şaralardy jüzege asyru — köpkonfessiialy elımızdıŋ tūtastyǧy men ūlttyq qauıpsızdıgın ekstremizm qaterınen qorǧap, onyŋ aldyn alu, anyqtau, jolyn kesu jäne saldaryn joiu, sondai-aq ekstremizmnıŋ jüzege asuyna jol aşatyn sebepter men alǧyşarttardy anyqtap, auyzdyqtap otyru – memlekettık organdardyŋ basty mındetı. Bır sözben aitqanda, zaŋnamalyq deŋgeide ekstremizmnıŋ tamyryn tereŋ jaiuyna mümkındık bermeitın alǧaşqy kezeŋınen bastap ony zalalsyzdandyryp otyruǧa basymdyq berıledı.
Ekstremizmnıŋ aldyn alu profilaktikalyq jūmystarda körınıs tabady. Atap ötılgen zaŋ boiynşa, būl – qūqyqtyq, ūiymdastyruşylyq, tärbielık, nasihattyq jäne özge de şaralardyŋ qalypty jüiesı.
2012 jyldyŋ bırınşı jartyjyldyǧynda osynau aqparattyq-nasihat toptary respublika deŋgeiınde 1600-den astam ıs-şara, iaǧni, seminarlar, otyrystar men döŋgelek üstelder ötkızıp, jalpy sany 53 myŋ adamdy qamtydy.
Saqal men kiımdı naqty bır qūbylystyŋ belgısı deuge bolmaidy
– «Ekstremist» dese, jūrt saqaly qauǧadai, balaǧy şolaq, soŋynan hidjab kigen qyz-kelınşek ertken jıgıttı elestetetın boldy. Mūny ekstremistıŋ äleumettık portretın qūraityn obrazdarǧa jatqyza alamyz ba?
– Bır jaǧynan alyp qaraǧanda, dıni negızı bar saqal men jamylǧy mäselesı – ärkımnıŋ jeke şaruasy. Aitpaqşy, būl tek islamǧa ǧana tän erekşelık emes. Bız saqaldy pravoslav hristian men basyn bürkegen hristian äielderın de kezdestıre alamyz. Osy sebeptı de saqal men kiımdı naqty bır qūbylystyŋ belgısı deuge bolmaidy.
Būǧan qosa, ekstremistık maqsattaǧy adam jūrt sanasynda qalyptasqan obrazdan qaşyp, ädeiılep syrtqy keiıp-kelbetın özgerte saluy da mümkın. Osylaişa, zaiyrly qoǧamdastyqqa tastai batyp, sudai sıŋıp, özınıŋ közdegen maqsattaryn ındetıp jüre beruı mümkın. Alys-jaqyn şetelderdegı radikaldar baiaǧyda-aq osy taktikany basşylyqqa alǧan, bızde de olar keiıngı kezde osy ädıske köşe bastady.
Kiım taŋdaudaǧy dıni auandy, aitalyq, memlekettık qyzmette nemese jalpyǧa bılım beru mektepterınde jüzege asyrudy oryndy dep aitu qiyn. Būl – zaiyrly jäne köp konfessiialy bolyp tabylatyn Qazaqstannyŋ osy şaqtaǧy şyndyǧy. Sondyqtan da barşaǧa ortaq qandai da bır beitarap standart kerek. Är aluan dın ökılderınıŋ özındık dıni tanymdaryna säikes jūmysqa, mysaly, äkımşılık pen emhanaǧa älem-jälem bolyp barǧanyn elestetıp jatudyŋ özı qiyn.
– Qazaqstandaǧy dıni radikalizm turaly söz qozǧalsa, säläfizm taqyryby basa aitylady. Säläfizmnıŋ Qazaqstan üşın dästürlı bolyp tabylatyn hanafi mazhabynan basty aiyrmaşylyǧy nede?
– Sunnittık islamdaǧy mazhabtardy hristiandyqtaǧy pravoslavie men katolisizmmen äste salystyruǧa bolmaityndyǧyn atap ötken jön. «Mazhab» sözınıŋ özı «baǧyt, dūrys jolǧa şaqyru» degendı bıldıredı. Fikh boiynşa mazhabtar bar, iaǧni, islam qūqyǧy boiynşa jäne de aqida boiynşa, bylaişa aitqanda, senımge negızdelgen mazhabtar bar. Şariǧattyŋ qūqyqtyq mektepterı bır bölek te, özındık qūdaitanuşylyq tanymdaryn alǧa tartqan mektepter bır bölek.
Qūqyqtyq mektepterdı – «mazhabtar», al, qūdaitanuşylyq mektepterdı «aqidalar» dep ataidy. Būl – qalyptasqan ürdıs. Osy ekı belgıge qarap-aq, islamdaǧy barşa baǧyttardy jıktep, saralauǧa bolady. Degenmen de, mazhab pen aqidanyŋ müldem ekı bölek närse ekenın ūǧyp alǧan jön. Mysaly, materialdyq zattardy poşymy men tüsıne qarap jüieleuge bolady. Iаǧni, zat tört būryşty jäne qyzyl, qyzyl jäne döŋgelek, döŋgelek jäne jasyl boluy mümkın. Al osyǧan kelıp, būl qyzyl ma, älde, döŋgelek pe dep sūrau aǧattyq.
Mälım bolǧandai, dästürlı qūqyqtyq mazhabtardyŋ sany törteu: hanafi, şafiǧi, mäliki, hanbali. Qūdaitanuşylyq ırı mektepterdıŋ sany ekeu: aşarittık jäne Ortalyq Aziia üşın dästürlı sanalatyn matrudi mektepterı. Būl oraida, matrudi aqidasy tarihi tūrǧyda belgılı bır aimaqtarda hanafi mazhabymen astasqan, al aşarittık bolsa, şafiǧi jäne mäliki mazhabtarymen jäne t.b. astarlasyp ketken.
Säläfizm keŋınen taralǧan aimaqtarǧa Saud Arabiiasy jäne onymen ırgeles Parsy şyǧanaǧy elderı jatady. Olarda hanbali mazhaby basymdyqqa ie. Degenmen, säläfizmnıŋ özı bır mazhabty ūstanudy mındettı sanamaidy, al keibır säläfi ǧūlamalary mūndaidy basy bütın joqqa şyǧarady. Osy sebeptı de keşe ǧana namaz üirengenıne qaramastan, qandai da bır «mazhabtyŋ qajetı joq» dep negızsız jar salatyn säläfi qara köz jıgıtterdı kezdestıre alamyz.
Säläfiler «säläftardyŋ taza aqidasyn ūstanamyz», iaǧni, «aldyŋǧylardyŋ jolymen jüremız» dep dauryǧady. İslam dästürınde alǧaşqy üş tolqyn, iaǧni, Mūhammed paiǧambardyŋ (s.ǧ.s) sahabalary jäne de odan keiıngı mūsylmandardyŋ ekı tolqyny osylai atalady. Alaida, dästürlı qūdaitanuşylyq mektepterdıŋ köptegen ökılderı mūnymen eş kelıspeidı.
Sonymen qatar Qazaqstandaǧy säläfitterdıŋ köpşılıgı qazaqtyŋ salt-dästürlerın «bidǧat» («rūqsat etılmegen jaŋalyq») nemese «şirk» (Allaǧa serık qosu) sanai otyryp, tübegeilı joqqa şyǧarady. Būl rette olar halqymyzdyŋ keibır ūlttyq dästürlerınıŋ paida boluynyŋ tarihi sebepterın tüsınuge tyryspaidy.
Qoǧamymyzda oryn alǧan taǧy bır dauly mäsele – bızdıŋ säläfi dep esepteletın dındarlar saudiialyq şeihterdıŋ öz azamattary – saudiialyqtar üşın şyǧarǧan pätualaryn jiı qoldanyp, oilanbastan el ışınde nasihattap jür. Al, islam dästürınde pätualardy är elde özınıŋ müftiı şyǧaratyny jūrtqa belgılı. Bır mäsele boiynşa ükım naqty bır qoǧamdaǧy jaǧdailarǧa bailanysty ärtürlı boluy mümkın. Taǧy da qaitalap aitamyn, būl islam qūqyǧynyŋ negızderı. Qasiettı Qūran Kärımde Alla Taǧalanyŋ adamdardy ärtürlı qylyp jaratqandyǧy turaly aitylady («Äi, adam balasy! Şübäsyz senderdı bır er, bır äielden (Adam, Hauadan) jarattyq. Sondai-aq bır-bırıŋdı tanularyŋ üşın senderdı ūlttar, rular qyldyq) (49-süre «Hujurat», 13-aiat).
Mūndaǧy basty mäsele mynada: bızdıŋ elımızde dıni ädep-ǧūryptar men dästürler sabaqtastyǧy üzılıp qalǧan, osy sebeptı de bır uaqytta ainadai tazalanǧan dıni örıste är aluan dästürlı emes aǧymdarǧa aram şöp syndy qaulady jäne de būl sözımız islamdyq aǧymdarǧa ǧana qatysty emes.
Sonymen, qazırgı eŋ maŋyzdy jait – jastarymyzdy, öskeleŋ ūrpaqty osyndai keleŋsız közqarastarǧa ūrynudan saqtap qalu. Al üiırınen adasqandar erte me, keş pe, aqylǧa kelse kerek. Qazırdıŋ özınde säläfiler 2000-jyldardaǧydai emes, özderın anaǧūrlym saq ūstaidy. Keibıreulerı tıptı kündelıktı tūrmysta dästürlı hanafi mazhabyn qabyldauǧa äzır, qala berdı meşıtte otyrǧanda imamdar ötınıp jatsa «ämin» dep aiǧailauyn da qoiyp keledı.
Şeşuşı faktor — dıni sauatsyzdyqty joiu
– Sonda özın-özı jaratyndar, polisiia qyzmetkerlerın atyp jatqandar kımder?
– Mūny täkfırşıler men jihadşylar jasap jatyr. Şyntuaitynda, būl bır üderıstıŋ ekı satysy, täkfır men jihad jariialaudyŋ arasy bır-aq qadam.
Özderınıŋ qūdaitanuşylyq közqarastary boiynşa olar säläfilerge jatady, iaǧni, säläfi aqidasyn ūstanady, äitse de saiasi tūrǧyda Mysyr radikaly, 1966 jyly ölım jazasyna kesılgen, keide bügıngı mūsylman älemındegı barşa ekstremistık aǧymdardyŋ «ökıl äkesı» atanyp jürgen Said Kutbanyŋ ädısıne säikes äreket etedı. Sondai-aq, ol «Mūsylman bauyrlar» qozǧalysynyŋ radikaldy qanatynyŋ ideologtarynyŋ bırı. Sondyqtan da bız täkfirizmdı dıni ekstremizmnıŋ eŋ bır qaterlı türı retınde tanimyz.
– «Täkfır» degenımız ne?
– Būl söz «senbeu», «käpır», «dınge senbeitın» degen mändegı «kufr» sözımen tübırles. Täkfır jasau degenımız dınsız dep jariialaudy bıldıredı. Mysaly, Qazaqstandaǧy täkfırşılerdıŋ eŋ süiıktı ädetınıŋ bırı – bes uaqyt namazyn oqymaityn mūsylman balasyn käpırge jatqyzu, iaǧni, būl degenıŋız – ainalamyzdaǧylardyŋ basym bölıgıne sausaq şoşaitu, kül şaşu. Būl barlyq däuırlerdegı islam ǧalymdary ūstanǧan qaǧidalarǧa qaişy keledı.
Dästürlı fikh – islam qūqyǧynda täkfır jasaudyŋ şarttary naqty körsetılgen jäne de olardyŋ bärı bızdıŋ basynan baqaişyǧyna deiın radikaldanǧandar tarapynan barynşa būzyluda. Mıne, osy sebeptı de mūsylmandardyŋ dıni sauattylyǧyn arttyru asa maŋyzdy, qysqasy, kez kelgen kısı täkfırşıge aiqyn qatelıkterın közge şūqyp tūryp körsete bılu kerek.
Sondyqtan da taǧy bır ret qaitalap aitamyn, terıs piǧyldy aǧymdarmen kürestegı şeşuşı faktor nadandyqty, dıni sauatsyzdyqty joiu bolyp tabylady. Osy şartty oryndaǧanda ǧana ekstremizm men terrorizmge qarsy küres şaralary nätijelı bolady.
– Soŋǧy kezderı säläfilermen qatar «Tabliǧi jamaǧat» atauyn alǧan qozǧalys turaly äŋgımelerdı de qūlaǧymyz jiı şalyp qalyp jatady. Osy jönınde aitsaŋyz?
– «Tabliǧi jamaǧat» – sözbe-söz berer bolsaq, «Uaǧyz qauymy», 1926 jyly Ündıstanda Maulana Mūhammad İliias tarapynan ūiymdastyrylǧan saiasi, pasifistık dıni qozǧalys.
Qozǧalystyŋ erekşelıgı baǧdarlamasynyŋ, jarǧysynyŋ, müşelık institutynyŋ joqtyǧy. Osyǧan bailanysty, syrt közge būl top joq ta siiaqty. Būl ūiym közge körıne bermeidı, tiısınşe, köptegen jyldar boiy sarapşylardyŋ nazarynan tys qalyp keldı.
– Olarǧa qatysty qandai tüitkılder bar?
– Tabliǧşylar jüielı praktika men üi aralap, esıkten esıkke jalǧasqan belsendı uaǧyzdy eŋ basty qūndylyq dep bıledı. Degenmen, olar tereŋ dıni bılım alǧandy qūptai bermeidı, oǧan nemqūraily qaraidy, arzymaityn närse dep esepteidı. Al, bızde sauatsyz uaǧyzşylar onsyz da jetkılıktı. Ötken ǧasyrdyŋ jiyrmasynşy jyldarynda Ündıstanǧa laiyq bolǧan närse XXI ǧasyrdaǧy Qazaqstanǧa mülde üilespeidı.
Būdan bölek, būl qozǧalystyŋ ökılderı jūmys ısteu, otbasyn baǧu sekıldı mındetterdı mülde eskere bermeidı. Mysaly, olar äiel, bala-şaǧasyn tastap, alys saparǧa kete beredı. El aumaǧyn adaqtap ketse maqūl, şetelderge tartyp ketuı de yqtimal.
– Arnaiy operasiialar kezınde terrorister tügeldei derlık joiylyp otyrady. Būl ädetke ainaldy. Qoǧamda osyǧan bailanysty sūraqtar köbeiıp tūr. Küş qoldanu ädısı özın-özı aqtap jatyr ma, būl qanşalyqty oryndy närse?
– Qoǧamda terrorizm jäne ekstremizm körınısterımen belsendı küres jürgızılıp jatyr. Soŋǧy kontrterroristık operasiialar qūqyq qorǧau organdarynyŋ osy salada täjıribe jinaqtaǧanyn körsetedı. Olar radikaldardy anyqtap, qoǧamǧa qarsy jasalǧaly jatqan qylmystyŋ aldyn alady.
Ras, Almaty, Atyrau jäne özge de öŋırlerde jürgızılgen bırneşe antiterroristık operasiialar barysynda terroristık toptardyŋ barlyq müşelerınıŋ közı joiyldy. Täjıribe barysy terroristerdıŋ asa qatygez, öz ömırlerın de, özgelerdıŋ ömırın de būiym qūrly körmeitının däleldep otyr.
Ara-arasynda kriminaldyq elementter men dıni radikaldardyŋ midai aralasyp ketuı körınıs berude. Şyndyǧyna kelsek, tıpten dıni ideologiiany jamylǧy etken qylmyskerlerdı qūqyq qorǧau organdary zalalsyzdandyryp jatyr.
– İslam turaly aitqanda zamanaui ömır salty, bılım men mädeniettı dınmen ūştastyru mäselesı de qylaŋ beredı. Basqaşa aitqanda, islam men modernizasiianyŋ astasuy mümkın be?
– Hanafi mazhabynyŋ ruhani praktikasy ūlttyq mädeniet pen jalpy adamzattyq qūndylyqtarǧa qūrmetpen qarap keldı. Būl tüsınıktıŋ özegınde erteden islamǧa tän bolǧan toleranttylyq pen aşyqtyq ūǧymdary jatyr. Qazaqstandaǧy ūltaralyq jäne konfessiiaaralyq kelısımnıŋ dünietanymdyq keşenı şamamen bır jarym myŋ jylǧa sozylǧan islami örnek arqyly qalyptasty.
Zamanaui qoǧam öskeleŋ dınilık pen modernizasiianyŋ üilese alatynyn kün tärtıbıne qoiyp otyr. Bızdıŋ elımızdegı jaŋǧyrtu mūraty ädıldık, adaldyq, ruhanilyq, bılım, eŋbek, senım jäne qūqyq basymdyǧy sekıldı qūndylyqtardyŋ qoǧamda qalyptasuyna bailanysty. Būl qūndylyqtardyŋ bärı de islam qūndylyqtary bolyp tabylady. Bıraq būl üşın imamdarmen tıze qosa otyryp äreket etu kerek. Meşıtterdegı uaǧyzdarda dınge şaqyru ǧana emes, jastardy ruhani damuǧa, bılımge, kemeldenuge, qoǧam igılıgı üşın ter töguge şaqyratyn nasihattar da aityluy kerek.
Mūsylman renessansy däuırınde dın mädeniettıŋ joǧary deŋgeiıne köterılıp, ǧylymnyŋ, filosofiianyŋ, bılımnıŋ damuyna sebepşı boldy. Bükıl älemge islam aiasynda qyzmet etken ǧūlama ǧalymdar men oişyldardyŋ esımderı etene tanys.
Ökınışke qarai, bızdıŋ zamanymyzda dın men zaiyrly tūrmysty qarsy qoiuşylar da kezdesedı. Şyndyǧynda, dın azamattarymyzdy, bırınşı kezekte jastarymyzdy bılım aludan, otbasynan, halyqtyq ǧūryptar men dästürlerden aiyrmauy kerek. Meşıtke baru jastardyŋ sapaly bılım aluyna kedergı bolmauǧa tiıs, olar intellektualdyq tūrǧyda da, boi tüzeu jaǧynan da teŋ ösıp damuy kerek. İslam – oqşaulanu men ruhani kembaǧaldyqty qabyl almaityn dın, ol dınge senuşılerdı jalpyǧa tüsınıktı gumanistık qūndylyqtarǧa baulidy.
– Äŋgımeŋızge rahmet!
Äŋgımelesken: Aina SARYBAI