Astanada osy künderı köşe önerınıŋ Astana Street Art festivalı ötıp jatyr. Elordanyŋ 20 jyldyǧyna arnalǧan şaraǧa jas suretşılerden qūralǧan bes komanda qatysuda. Köp qabatty tūrǧyn üilerdıŋ qabyrǧalarynan qalanyŋ körkıne körık qosqan suretterdı baiqasaŋyz, būl – solardyŋ tuyndylary. Atalmyş jobany Astana qalasy Mädeniet jäne sport basqarmasy «Qūlanşy» qazırgı zamanǧy öner ortalyǧymen bırge qolǧa alyp otyr.
«Bügınde graffiti beiresmi öner ǧana emes, tūtastai mädeni bır baǧytqa ainaldy. Bır kezderı osyndai suretter zaŋsyz bolyp sanalǧan, al endı olardy Niu-Iork, London, Parij, Mäskeu sekıldı älemnıŋ ırı qalalarynda tarihi ǧimarattardyŋ qasbetterınen köre alamyz. Būl suretter Astanany ajarlandyra tüspek» deidı Astananyŋ Mädeniet jäne sport basqarmasynyŋ basşysy Bolat Majaǧūlov. Jobaǧa qatysyp jatqan suretşıler tuyndylaryn Astananyŋ mereitoiyna tartu etıp, şyǧarmaşylyqtary arqyly jergılıktı tūrǧyndarǧa quanyş syilamaq.
«Jas suretşıler üşın būl ülken täjıribe. Būl rette keneptıŋ ornyna qalalyq ǧimarattardyŋ qasbetterın paidalanu – eles-qiialyna erık berıp, qalaǧanyŋdy saluǧa mümkındık beredı» deidı «Qūlanşy» qazırgı zamanǧy öner ortalyǧynyŋ artdirektory Aigül Tegjanova.
Jūmystardyŋ basym bölıgınen qazaq halqynyŋ dästür-saltyn, bır sözben aitqanda, ūlttyq erekşelıkterın köruge bolady. Mysaly, Kenesary köşesındegı №63 üide kiız üidıŋ janynda tūrǧan qazaq qyzy beinelengen. Nūrlan Qilybaevtyŋ eskizı boiynşa jobalanyp, «Yqylas» atauy berılgen būl surettı Erjan Tanaev, Aqqali Zäkırov, Ainūr Seiıtkerımova, Roman Glavatskih, Ädılbek Qarakesekov jäne Fariza Jahanova salyp şyqty.
Astananyŋ audandary da qalany bezendıruge üles qosuda. Köktemde «Urban Art Astana» atty halyqaralyq baiqau jariialandy. «İnstagram», «Feisbuk» äleumettık jelılerınde halyq köp dauys bergen suretter bügınderı anyqtaldy.
«Baiqauǧa älemnıŋ türlı elınen 30-dan astam suretşınıŋ 70-ten astam eskizı kelıp tüstı. Olardyŋ qatarynda Qazaqstan, Resei, Ukraina, Qyrǧyzstan, İndoneziia, Polşa, İspaniia, İzrail, Äzerbaijan sekıldı elder bar. Qazylar alqasy jäne Astana qalalyq qūrylysy 26 eskizdı taŋdap aldy. Solardyŋ ışınde üzdık 6 tuyndy ırıktelıp alyndy. Endı olar audanymyzdyŋ körkın arttyra tüspek» deidı Saryarqa audanynyŋ äkımı Arman Tūrlybek.
Bırınşı oryndy graffiti baǧytyndaǧy Jambyl Jabaev pen Säken Seifullinnıŋ portretterın salǧan «Art» toby ielendı. Ekınşı oryndy Evgenii Chestyŋ «Tabiǧat taqyrybynda kollaj» atty tuyndysy aldy. Al üşınşı oryn Dmitrii Levochkinnıŋ «Sūltandar» suretıne būiyrdy. Osylarǧa qosa Konstantin Danilovtyŋ «Tarih», Maksim Revanştyŋ jäne «DOURONE» tobynyŋ (İspaniia) tuyndylary jüldege ılıktı. Talanttarǧa qoldau körsetu maqsatynda Azamat Halyqovtyŋ «Qyz quu» taqyrybyndaǧy tuyndysy da taŋdap alyndy.
Arman Tūrlybektıŋ aituynşa, jūrtşylyq suretterdıŋ ornalasuyna qatysty ūsynystaryn jetkızedı alady. Al ASTANA Street Art festivalı 30 mausymǧa deiın jalǧasady.
Amanǧali QALJANOV
