M.Ötemısūly atyndaǧy Oquşylar saraiynda Astana qalasy Saryarqa audany äkımınıŋ jetım balalar men äleumettık az qamtylǧan otbasylardyŋ balalaryna arnalǧan Jaŋa jyldyq şyrşa merekesı öttı.
Aituly şaraǧa 230 bala qatysty. Barlyq şaqyrylǧan balalar jaŋa jyldyq syilyqtarǧa ie boldy. Öz kezegınde audan äkımı Ermek Ospanov: «Sızderdı jaŋa jyl merekesımen şyn jürekten qūttyqtaimyn. Osy jyl sızder üşın jaqsylyqtarǧa toly bolsyn. Elımızdıŋ eleulı azamattary bolyŋdar! Sızderge zor densaulyq, baqytty balalyq şaq tıleimın» dep öz qūttyqtauyn jetkızdı.
Konserttık baǧdarlamaǧa «Sozvezdie», «Bäiterek» bişıler ansamblı, «Baldyrǧan» sirkı, «Zvezdnyi chas» studiiasynyŋ änşılerı, «Güldäuren» änşıler toby jäne basqa da önerpazdar qatysty. «Qysqy mereke» änımen «Iýnost Astany» studiiasy köpşılık köŋılınen şyqty. «Er töstık» ertegısınıŋ jelısınde ūiymdastyrylǧan konsertte jaǧymsyz keiıpker Bektorymen bi jarysy boldy. Bektory jeŋılıs tauyp, Aiaz ata bärın dostyqqa, bırlıkke şaqyrdy. Şattyqqa toly şara soŋynda balalar «Nūr» qazaq teatry sahnalaǧan «Qar hanşasynyŋ saraiynda» atty ertegını tamaşalady.
Erbol JANAT
