Elordada «Qazaqstan» ortalyq konsert zalynda QR Mädeniet jäne sport ministrlıgınıŋ ūiymdastyruymen ötken «Täuelsızdık – qasietım, qasterlım!» atty respublikalyq aqyndar aitysy märesıne jettı. Bas jüldege Nūr-Sūltan qalasynyŋ äkımdıgı temır tūlpar tıktı.
Atalǧan dübırlı dodanyŋ ädılqazy alqasyna körnektı öner qairatkerı, ūstaz, Qazaqstan jäne KSRO Halyq ärtısı, «Qazaqstannyŋ Eŋbek Erı» Asanälı Äşımov töraǧalyq ettı. Sonymen qatar aitys aqyny, Qazaqstannyŋ halyq aqyny Äsiia Berkenova, üş dürkın «Altyn dombyra» iegerı Mūhtar Niiazov, aitysker aqyn, Qazaqstannyŋ eŋbek sıŋırgen qairatkerı Amanjol Ältaev jäne özge öner, qoǧam qairatkerlerı qazylyq etıp, 22 aqynnan finalǧa 12 aqyndy jüirık dep tanydy. Aqtyq synda Bekarys Şoibekov, Rüstem Qaiyrtaiūly, Jansaia Musina, Erkebūlan Qainazarov, Jıger Böken, Rauan Qaidarov, Qalijan Bıldäşov, Bauyrjan Şirmedinūly, Tölegen Jamanov, Nūrzat Qaru, Meiırbek Sūltanhan öner körsettı.
Sonymen, qazylar alqasynyŋ şeşımımen merekelık aitysta aqyndardyŋ eşqaisysy da jüldesız qalmady. Yntalandyru syilyǧyna Arǧynbek Qalbaev, Tölegen Jamanov, Bauyrjan Şirmedin, Nūrzat Qaru, Rauan Qaidarov, Qalijan Bırdäş ie boldy. Qazylar alqasynyŋ töraǧasy Asanälı Äşımovtıŋ ūsynysymen taǧaiyndalǧan arnaiy jülde Böken Jıgerge berıldı. Üşınşı orynǧa ekı aqyn laiyq dep tanylsa, ony Rüstem Qaiyrtai men Jansaia Musina enşıledı. Ekınşı orynǧa Meiırbek Sūltanhan ie boldy. Bırınşı oryn men «Aitystyŋ aqtaŋgerı» tösbelgısı Erkebūlan Qainazarovqa berıldı. Bas jülde – «Altyn dombyra» jäne Nūr-Sūltan qalasynyŋ äkımdıgı taǧaiyndaǧan temır tūlpar Bekarys Şoibekovke būiyrdy.
