Ūly Abaidyŋ 175 jyldyǧy aiasynda QR Mädeniet jäne sport ministrlıgınıŋ qoldauymen Sankt-Peterburg qalasynyŋ Resei memlekettık kıtaphanasynda «Abai» aqparattyq-mädeni ortalyǧy aşyldy.
Is-şara barysynda körşı elde tūratyn qandastarymyz qazaq jäne orys tılderınde Abai Qūnanbaiūlynyŋ şyǧarmalaryn oqyp, «Daryn» memlekettık jastar syilyǧynyŋ laureaty Bekzat Smaǧūlov Abai änderın oryndady.
«Osy ortalyqty aşu aiasynda Abai şyǧarmalarynan kıtap körmelerın ūiymdastyrdyq. Onyŋ ışınde ūly aqynnyŋ bırneşe tılge audarylǧan şyǧarmalary da bar. Atap aitatyn bolsaq, jaqynda ǧana Qazaqstan Prezidentı Qasym-Jomart Toqaevtyŋ bastamasymen jaryq körgen «Abai» atty kıtaptardy qoidyq. Būl kıtaptarda aqynnyŋ şyǧarmalary düniejüzınıŋ 10 tılıne audarylǧan bolatyn. Audarma jinaqtarǧa aqynnyŋ 145 öleŋı, 3 poemasy men 45 qara sözı kırdı. Odan bölek, abaitanuşylar men aqynnyŋ şyǧarmalary engen kıtaptardy körmege qoiyp otyrmyz» dedı QR Ūlttyq akademiialyq kıtaphanasynyŋ direktory Ümıthan Mūŋalbaeva.
Ortalyqqa el Prezidentı Qasym-Jomart Toqaevtyŋ «Sabaqtastyq. Ädıldık. Örleu» eŋbekterınıŋ 1,2,3,4 tomdary, «Svet i Ten», «Preodolenie», «On delaet istoriiu» atty kıtaptary syiǧa tartyldy.
Jalpy biyl şetelderde bırneşe «Abai» ortalyǧy aşyldy. Atap aitqanda, Chehiiada, Germaniiada jūmysyn bastady. Osynyŋ bärıne Ūlttyq akademiialyq kıtaphana mūryndyq boldy. Jalpy atalmyş kıtap ordasy biyl 1 000-nan asa ıs-şara ötkızdı.
«Bügınde Ūlttyq akademiialyq kıtaphanasynda kıtaptar, sirek kıtaptar, gazet-jurnaldar siiaqty jalpy 1,5 million materialdar qory bar. Odan bölek, 2007 jyly aqparattyq teŋsızdıktı tömendetu baǧdarlamasy boiynşa Ūlttyq akademiialyq kıtaphana bazasy aiasynda ūlttyq elektrondy kıtaphana bazasy jasaldy. Bügınde osy ūlttyq elektrondyq baza boiynşa 60 myŋnan asa mätındegı kontentımız bar. Onyŋ ışınde tek qana ädebi kıtaptar emes, ǧylymi jäne sirek kezdesetın kıtaptar, gazet-jurnaldar, dissertasiialar, audio kıtaptar, beinematerialdar öte köp. Aita ketsek, osy uaqytqa deiın 108 basqa eldıŋ tūrǧyndary sol materialdarymyzben tanysqan» deidı kıtaphana direktorynyŋ aqparattyq resurstar jäne jastar saiasaty jönındegı orynbasary Nūrjan Joldybalinov.
