Būryn kämeletke jasy tolǧan bozbala äskerge barǧysy keletın. Jäne ony märtebe köretın. Al, bügınde jastar azamattyq boryşyn öteuden qaimyǧatyn boldy. Äiteuır, soqtaldai-soqtaldai jıgıtterımız äskerge barudan qaşyp, medisinalyq komissiiadan ötpeudıŋ türlı amaldaryn qarastyrady. Qazır äskerge barmaǧanyna eşkım namystanbaityn boldy da.
Oǧan sebep, keiıngı kezderı telearnalarda aşyq körsetılıp jatqan äskerdegı äleumettık jaǧdailar bolsa kerek. Būl oqiǧa jas jetkınşekter men olardyŋ ata-ana, tuǧan-tuystaryn şoşytary anyq. Äskerge barudan jaltarudyŋ eŋ bırınşı sebebı osy beinerolikterde siiaqty. Ūryp-soǧyp jatqan sarbaz jaily beinematerialdar internet pen ūialy telefondarda da tolyp jür. Öz-özıne qol jūmsau faktısı de az emes. Maidanǧa emes, Otan tynyştyǧyn küzetuge attandyrǧan ata-ana osydan keiın qaitıp ūlyn äskerge jıbersın? Qazırgı taŋda halyq kinodan ne körse, soǧan imandai senedı emes pe? Endeşe, qazaq jıgıtterın jıgerlendıretın kinolar qajet. «Jaujürek myŋ bala», bügınde tūsaukeserı jürıp jatqan «Bauyrjan Momyşūly» syndy filmder sonyŋ bastauy bolary anyq.
Derekterge süiensek, qalalyqtar men auyldyqtardyŋ arasynda äskerge degen qūlşynys är aluan eken. Mysaly, qalalyqtarda sarbaz atanu yntasy auyl balalaryna qaraǧanda tömen. Sondai-aq, jetkınşekterımız öz jeke basynyŋ müddesı üşın äsker qataryna qosylǧysy keledı. Iаǧni, äskeri bilet alu arqyly mansabyn joǧarylatu mümkındıgın közdeidı. Bügınde äskeri ädıs-täsıldı meŋgerıp, erlıktı şyŋdau är azamattyŋ Otan aldyndaǧy boryşy dep qaraityndar az. Keide keibır jastardyŋ terıs jolda jürgenın, jaman äreketterge baryp jatqanyn körgende, janyŋ auyrady. Sondyqtan olarǧa būqaralyq aqparat qūraldary arqyly, balabaqşa, mektep, joǧary oqu oryndarynda barynşa patriottyq tärbie beruge tyrysqan jön. Äskerge baru, äskeri ömırdı köru, myltyq atu, türlı äskeri tehnikany meŋgeru kämeletke tolǧan ärbır bozbalanyŋ qyzyǧuşylyǧyn tudyruy kerek. Sebebı, tärbielı azamat bar aqyl kenın Otanyn qorǧauǧa jūmsaidy. Olar Otanǧa qyzmet etuden, Otandy qorǧaudan eş uaqytta qaşpaidy.
Erkejan SÄTIMBEK
e.satimbek@astana-akshamy.kz
