МАҚСАТЫМЫЗ – ЕЛ ИГІЛІГІНЕ ҚЫЗМЕТ ЕТУ
Тәуелсіздікпен тұстасып дүние есігін ашқан, билік буынымен бірігіп, халық қамы үшін қызмет атқарып келе жатқан мәслихаттарға биыл 20 жыл толып отыр.
1994 жылдың наурыз айында еліміздің жаңа өкілетті органы болып табылатын мәслихаттарға депутаттар сайлауы өткізілді. Міне, содан бері біздің Астана қалалық мәслихаты да Қазақстан Республикасының Конституциясына және Қазақстан Республикасының заңнамаларына, сондай-ақ «Қазақстан Республикасындағы жергілікті мемлекеттік басқару және өзін-өзі басқару туралы» заңға сәйкес өз жұмысын жүргізіп келеді.
Қазіргі уақытта қалалық мәслихатта 25 сайлау округі бойынша сайланған осынша депутат бар. Олар өз сайлаушыларымен үнемі кездесу өткізіп, коммуналдық қызмет көрсетулер, жолдардың жағдайы, тұрғын үй мәселелері, еңбеккке орналастыру, мектепке дейінгі тәрбие, медициналық көмек көрсету, дәрігерлік құрал-жабдықтармен қамтамасыз ету секілді өмірлік маңызды мәселелердің жүзеге асырылуына үлес қосып, қала әкімдігімен бірлесе отырып қызмет етуде.
Астана қалалық мәслихатының ең байырғы депутаты – Николай Ильич Мещеряков. Ол бірінші шақырылымнан бері бесінші рет депутат мандатын иеленіп, бүгінгі күнге дейін сайлаушылар сеніміне ие болып келеді. Ал, мен соңғы үш шақырылымда жергілікті мәслихатқа депутат болып сайландым. Содан кейін депутаттық тәжірибесі көп Бауыржан Исабаев, ол өкілеттілігі тоқтатылған депутаттың орнына сайланған болатын.
Әлі есімде, 2003 жылы үшінші шақырылымның бірінші сессиясы өткізілді. Ол кезде мен қаладағы Жастар шағын ауданының тұрғындарын қамтитын №18 округ бойынша депутат болып сайланған болатынмын, ал төртінші және бесінші шақырылымда №3 округ бойынша сайланып, Сарыарқа ауданындағы Тілендиев, Желтоқсан, Әуезов, Жеңіс көшелерінің тұрғындарына қызмет еттім. Әрине, уақыт алға жылжыған сайын адамдардың мәслихатқа, жергілікті билік өкілдеріне деген сенімі артып келеді.
Бүгінгі таңда депутаттық корпуста білім, денсаулық сақтау мекемелерінің өкілдері, белгілі кәсіпкерлер мен ірі кәсіпорындардың басшылары, сонымен бірге атақты ғалымдар да, қысқасы, қарапайым халықтың мұң-мұқтажын жақсы білетін азаматтар бар. Міндетіміз – осы салалардағы барлық күрмеулі мәселелерді шешу. Сондай-ақ, біз тиісті бағдарламаларды бекітіп, жергілікті мемлекеттік басқару және өзін-өзі басқару туралы заң негізінде жұмыс істейміз. Биыл қыркүйек айында Алматы қаласында ҚР мәслихатының 20 жылдығына орай ұйымдастырылған ауқымды шараға астаналық бір топ депутат қатысып, ел игілігі жолында атқарған еңбегі үшін алғыс хаттармен марапатталды. Бұл да болса біздің еңбегіміздің еленгені деп білеміз.
Қаладағы барлық маңызды мәселелер мәслихат жанындағы тұрақты комиссиялардың отырыстарында қаралады, келелі кеңестер де осында өтеді. Өзім мәслихаттың бюджет, экономика, өнеркәсіп және кәсіпкерлік мәселелері жөніндегі тұрақты комиссияның мүшесі ретінде бюджеттің кіріс-шығыс бөлігін қарап, қорытынды шығаруға қатысып отырамын.
Жалпы, қалалық мәслихат депутаттарының барлығы да «Нұр Отан» партиясының мүшесі. Демек, олар халықтық партияның дамуына да үлкен үлес қосып жүр.
Мейрамбай ОРАЛОВ,
«Нұр Отан» партиясы Астана қалалық филиалы төрағасының орынбасары, қалалық мәслихаттың депутаты