Мейірімділер мекені
ҚР Ұлттық музейінде «Астана – рухы мықты адамдар қаласы» бағдарламасының аясында елорданың 20 жылдығына арналған «Мейірім» І балалар шығармашылығының инклюзивті музейлік фестивалі өтті.
Фестиваль қарсаңында арнайы білім беруді қажет ететін балалар мен жасөспірімдер арасында байқау жарияланды. Оған барлығы 400-ге жуық бала өтініш берді. Оның ішінде 100-ден аса балдырған бейнелеу өнері бойынша (сурет, қолдан бұйымдар жасау және т.б.), 200-ден аса бала орындаушылық өнер бойынша (вокал, би өнері, аспаптарда ойнау, көркемсөз оқу) қатысты. Ал 120 бала гала-концертке өтті.
«Музей өткен жылдан бері мүмкіндігі шектеулі жандарға кедергісіз орта қалыптастыру, музейлік білім беру арқылы Қазақстан мен басқа да елдердің мәдени құндылықтарын көрсету, ой-өрісін кеңейту, шығармашылық мүмкіндіктерін дамытып, қиялдарын ұштау мақсатында оларға әлеуметтік бағытталған «Мейірім» жобасын жүзеге асырып келеді, – деді шараның ашылу салтанатында сөз алған ҚР Ұлттық музейі директорының орынбасары Абай Сатыбалдин.
Фестивальді ұйымдастырушылардың бірі – «Нұр Отан» партиясы Астана қалалық филиалы атынан аталмыш филиал төрағасының орынбасары Владислав Сергеев бұл шараның маңызын атап өтті.
Аталған фестиваль аясында музей шеберлерінің шеберлік сағаттары да өткізілді. Атап айтсақ, Ұлттық музейдің бас сақтаушысы, киіз басу өнерінің шебері Рыскүл Бекталиева, зергер-шебері, суретші-реставраторлар Санат Аятбеков пен Станислав Бачин, Қазақстан дизайнерлер одағының мүшесі, осы мәдени ошақтың бейнелеу өнері студиясының оқытушысы Мұхтар Байбосын, Ұлттық музейдің кіші ғылыми қызметкері Зухра Баянова түрлі дәрістер берді.
Фестиваль барысында бірнеше аталым бойынша өнерпаз балалар іріктеліп, оларға дипломдар, естелік сыйлықтар және «AILAND» отбасылық демалыс орталығының Мұхитаралына сертификаттар тапсырылды.
«Вокал» аталымында Данил Платицин бірінші орынды, екінші орынды Валерия Хан мен Іңкәр Ертайқызы, ал үшінші орынды Назерке Данайбек, Екатерина Политыко және Қайрат Дарын, Ерсайын Оспанов, Нарқыз Ілиясовадан құралған үштік иеленді.
«Мәнерлеп оқу», «Аспаптық орындау», «Хореография», «Бейнелеу өнері» аталымдарындағы жүлделер де иелерін тапты.