ҚР Тәуелсіздігінің 25 жылдығына арналған «Қуатты өңір – қуатты Қазақстан» бағдарламасының аясындағы шаралар Астанадағы Алматы қаласының күндерімен түйінделді. Мыңжылдық шаһар мәдениеті екі күн бойы елордада салтанат құрды.
ҚР Ұлттық музейінде өткен «Алматы – Тәуелсіздіктің алтын бесігі» атты мультимедиялық көрме мен Алатау баурайына жайғасқан қала туралы фотокөрмеге 30-дан астам археологиялық тарихи жәдігер мен 100-ге жуық фотосурет қойылды.
Көрмені ашқан Алматы қаласының әкімі Бауыржан Байбек көрменің тақырыбына тоқталды. Оның айтуынша, Қазақстан Конституциясы, егемендік туралы декларация, ұлттық валютамыз – теңгені шығару туралы шешім Алматыда қабылданды. Семей полигонын жабу туралы Жарлық та бұл шаһарда шығарылды. Сондықтан таң-далған тақырып та көрмеге сай келіп тұр.
Ал ҚР Ұлттық академиялық кітапханасында алматылық ақындар оқырмандармен кездесті. Олардың арасында киелі Түркістанның кешегісі мен бүгінгісін жырға қосқан Қасымхан Бегманов, «Тұлпарға мінген ұлы даланың, тарпаң мінезді ұлы боламын» деп жырлайтын Маралтай Райымбекұлы, С.Мұқанов пен Ғ.Мүсіреповтің мемлекеттік әдеби-мемориалдық музей кешенінің директоры Әділғазы Қайырбеков, Жанарбек Әшімжан, Есей Жеңісұлы сынды белгілі ақындар болды. Алматыдан арнайы келген қоғам қайраткері, қазақ тілінің жанашыры Асылы Осман келелі әңгіме өрбітті.
Ел Тәуелсіздігінің ширек ғасырлық мерейтойы мен қаланың мың жылдығына орай Алматы руханиятында биыл елеулі жаңалықтар орын алды. Жақында қалада «Алатау» дәстүрлі өнер театры мен дәстүрлі музыканың мультимедиялық орталығы ашылды. Алматы әкімінің орынбасары Арман Қырықбаевтың сөзінше, енді жақында қала тарихына арналған мұражай есігін шалқайта ашпақ.
Өткен сенбі күні Бейбітшілік және келісім сарайында Алматының эстрада-симфониялық оркестрі және қазақстандық эстрада жұлдыздарының қатысуымен ҚР Тәуелсіздігінің 25 жылдығына арналған гала-концерт өтіп, онда Айқын Төлепберген, Луина, Димаш Құдайберген, Диана Шарапова, Әли Оқапов, «МузАрт» ансамблі, «Қоңыр», «КешьЮ», «Жігіттер», «Сарын» және «Ринго» топтары ән салды.
Ал жексенбі күні бұл сарайда дәстүрлі музыка өкілдері астаналықтарды «Мәңгілік мұрат» атты концертте ән-күймен сусындатты. Олардың арасында «Сазген сазы» фольклорлық-этнографиялық оркестрі, Нұржан Жанпейісов, Талғат Әбуғазы, Айгүл Қосанова, Шолпан Даржанова, Ұлжан Байбосынова, Тілеулес Құрманғалиев сынды әншілер, күйшілер мен жыршылар болып, ұлттық музыканың мәйегін ұсынды.
Театр сүйер қауым да назардан тыс қалмады. Алматыдағы Мемлекеттік қуыршақ театры Астана қаласының Қ.Қуанышбаев атындағы мемлекеттік академиялық қазақ музыкалық драма театрының сахнасында «Алтын Адам» эпикалық спектаклін және балаларға арнап «Куклы шоу» мерекелік қойылымын қойды.
Аманғали ҚАЛЖАНОВ
