ҚАЛА БЮДЖЕТІ ҚАЙТА ҚАРАЛАДЫ
Кеше елорда әкімдігінің ғимаратында Астана қаласы мәслихатының сегізінші кезектен тыс сессиясы өтті. Жиын барысында бас шаһардың 2016-2018 жылдарға арналған бюджетіне өзгерістер енгізу туралы мәселелер талқыланды.
– Келер жылы Астанада әлемдік деңгейдегі маңызды шара – «ЭКСПО-2017» көрмесі өтеді. Оған дүниенің түкпір-түкпірінен миллиондаған қонақ келеді деп күтілуде. Соған байланысты қаламыздағы көрнекті орындарды ретке келтіріп, меймандар алдында ұятқа қалмайтындай болуымыз керек. Елорданың басты символы әрі айнасы – «Бәйтерек» монументі. Бүгінде осы монументтің кей тұстары ескіріп, жаңбыр жауған күндері сұрықсыз қалыпқа түсетінін, шынысының кейбір тұстары шағылғанын көрдік. Ол шыны – жоғары технологиямен әзірленген, аса көп кездесе бермейтін бірегей материал. Өкінішке қарай, ондай материал шығаратын зауыт біздің елде де, көршілес Ресей Федерациясында да жоқ. Іздестіре келе оны Италиядан таптық. Енді алдағы уақытта 400 миллионнан аса қаржыға шыныны жаңалауға тапсырыс беру керек, – деді елорда әкімінің орынбасары Андрей Лукин.
Сонымен қоса, ол қаладағы көнерген театрлардың қазіргі кейпі жайлы баяндады:
– Астанадағы мәдени ошақтардың ең таңдаулысы – театр-лар. Ал сіздер театрлардың аянышты ахуалын көрдіңіздер ме? Арнайы құрал-жабдықтары болмағандықтан, онда жаңа спектакльдерді де қою мүмкін емес. Сондықтан тез арада оларға көңіл бөліп, ғимараттарын жөндеуден өткізу керек, – деді.
Бұдан бөлек, А.Лукин белгілі бір жұмыстарды орындау мақсатында қосымша Тұрғын үй инспекциясы басқармасына – 143 миллион теңге, Сәулет және қала құрылысы басқармасына – 150 миллион теңге, Бас жоспардың іске асырылуына мониторинг жүргізетін урбанистикалық зерттеулер сызбасының жасалуына 50 миллион теңге бөлу керектігін айтты.
Ботагөз МАРАТҚЫЗЫ