Қырғыз қылқаламшыларының сыршырай сыйы
Бейсенбіде Тәуелсіздік сарайында Астананың 15 жылдық мерейтойына орай «Астана Қырғызстан суретшілерінің өнерінде» атты көрме ашылды.
Алатооның арғы жағындағы бауырларға Астананың қазіргі келбетін кенеп бетіне түсірту идеясына әуелі Қазақстанның Қырғызстандағы елшілігі бастамашы боп, бір топ «атымтай жомарт» азаматтар қолдау білдіріскен. Бізге белгілі Ғапар Әйтиев, Тұрғанбай Садықов сықылды суретшілердің ізін өшірмей жалғастырып келе жатқан қырғыз бейнелеу өнерінің бүгінгі өкілдері былтыр жыл он екі ай сағым ойнаған Сарыарқа төсінде ұшқан құстай көркейген елордамызды ерінбей аралап, сұлулығын сұлбалаған. Бүгін, міне, өзімізге көзүйреншікті көріністер қырғыз ағайындардың қылқалам құштарлығынан пайда болған туындылар арқылы қайта табысқанда, туған қаламыздың тіршілік ырғағын өзгеше өрісте сезінгендей болдық. Асфальтқа тырс-тырс тиген жаңбыр, қыстыгүнгі мүлгіген тыныштықта Есіл суына қармақ салған балықшы, шанамен сырғанағанда алдыңнан үдей соққан үскірік жел, жапырағы жамыраған бақ ішінде қыздың құлағын қытықтай сыр сыбырлаған бозбала, ақшамда түрлі түске енетін ертегідей қала, еңселі ғимараттар кенепке әшейін көшіп алғандай. Көрменің салтанатты ашылуына қатысқан Мәдениет және ақпарат министрі М.Құл-Мұхаммед «Мен мұны қырғыз суретшілерінің импрессионизмі дер едім. Әрине, тым асыра айтылып та тұрған шығар. Бірақ «Импрессионизм» әсер деген мағынаны білдірмей ме? Бұл қырғыз суретшілерінің шын мәнінде Астанадан әсерленуінің көрінісі» деп бағалады. Жобаға атсалысқан қылқаламшылардың бір парасы Чуйков атындағы Қырғыз мемлекеттік училищесін, Садықов атындағы Ұлттық өнер академиясын бітірген.
Араларындағы С.Османәлиев, Р.Бухарметов, Б.Ширалиев, С. Тұрабеков, О.Идрисов, Ж.Базарбаев, Ж.Жүнушев, Д. Цэрэндуржиева сияқты суретшілері заманында Мәскеу, Петербор көркемөнер мектептерінен тәлім алған, әйгілі халықаралық көрмелердің лауреттары.
Биыл – елімізде Қырғызстан мәдениетінің күндері өтеді әрі елорданың 15 жылдығы. Соның қарсаңында туған қаламыздың сыршырай жылнамасын түзуге қатысқан бауырлар баяғы бір жылдары өткізіліп тұратын еларалық суретшілер симпозиумы, пленерлердің керек-ақ екенін аңғартқандай. Туған өлкенің бүгінгі бейнелерін тарих жадында қалдыру үшін… Көрме 26 маусымға дейін жалғасады.
Еділ БӨКЕЕВ