– Құрылғанына көп бола қоймаса да, «Қоңыр» тобы бүгінде елге танылып үлгерді. Топ қалай құрылды?
Гүлім КӘРІМ, дәрігер
– Біздің топ 2007 жылы құрылды. Оған дейін мен жеке ән айтып жүрдім. Жазира мен Бауыржанға қарағанда жасым да ересектеу, тәжірибем де жоқ емес еді. Кішігірім байқаулардың жүлдегері де болдым. Қалаға кештеу келдім. Бірен-саран концерттерде ән салып, көріне бастадым. Сержан Молдасанұлымен студент кезден жолдаспыз. Әу баста, Сержанға этно-бағытта топ құру идеясын Ғалым аға айтқанын білесіздер. Сержан маған осы ойды айтып, ұсыныс жасады. Мен қуана келістім. Содан осы жобаға білек сыбана кірісіп кеттік. Ғалым, Тұрсынжан ағалармен бірігіп бірнеше әншілерді тыңдап, солардың ішінен Жазира Қошанова мен Бауыржан Асанбаевқа тоқтадық.
– Неліктен топтарыңызға «Қоңыр» деген атауды таңдадыңыздар?
Инара КӨПТІЛЕУОВА, оқушы
– Себебі, «Қоңыр» деген сөз – қазаққа тән атау. Қоңыр дауыс, қоңыр үн, назқоңыр. Сондықтан тобымызды осылай деп атағанды жөн көрдік. Жалпы, қазақ халқы баласына ат қоярда ойланып, толғанып, мазмұнды есімдер қойған. Болмысымызға келетін атау қойғанымызға қуанамыз.
– Қандай аспаптарда ойнай аласыз? Қиын емес пе?
Нұрасыл ЖҰМАҒҰЛОВ, оқушы
– Бірнеше аспапта ойнайтыным рас. Үйренем деген адамға қиындығы жоқ, қызығушылық болса, болғаны. Енді қылқобыз аспабында ойнауды үйреніп алсам ба деймін. Қазағымыздың қара домбырасы, шертер, сазсырнай, шаңқобыз, қоссаз аспаптарында ойнаймыз. Қоссаздың аты айтып тұрғандай, бұл аспаптың үстіңгі бөлігі – домбыра, астыңғы бөлігі – шертер, екі аспаптың дыбысын береді. Алғаш топ құрылғанда бағытымыз айқын болғанымен, өзiмізге ғана тән бір ерекшелік іздеуіміз керек болды. Сол кездері есіме қоссаз түсті. Бізді өзгелерден ерекшелендіретін де осы аспап сияқты.
– Ән таңдау барысында неге жүгінесіздер? Репертуарға енетін жаңа әнді кім таңдайды?
Айсұлу МАНАТ, қала тұрғыны
– Адамның рухын көтеретін де, көңілін құлазытатын, жайнататын да – ән. Бірінші кезекте әуен болғанымен, сөз құдіретінсіз әннің бағы жануы екіталай. Екеуі үйлесім тапқаннан кейін ғана жүректерге жол тартады. «Әннің де естісі бар, есері бар» деп Абай айтқандай, кейбір әуендер ерекше әсер беріп, жүрегіңді тербетсе, кейбірі керісінше жүйкеңе кері әсер етеді. Біздің ән таңдаудағы бас кеңесшілеріміз – Ғалым Доскен мен Тұрсынжан Шапай. Қазақ әнін терең зерттеп жүрген осы білгір ағаларымыз біздің көркемдік кеңесіміз десек болады. Ол ағалардың талғамы мен талабы өте жоғары. Репертуардағы әндердің басым бөлігін бізге сол кісілер ұсынған. Продюсеріміз Сержан Молдасанұлы да өнерден құралақан емес. Ән туралы өзіндік көзқарасы мен талғамы бар. Қандай да бір композитор бізге әнін ұсынса, ең алдымен ол әннің дәстүрлі бағытта болғанын қалаймыз. Біздің даусымызға, мәнерімізге лайық па, соған баса назар аударамыз.
– Жазғы демалысты қалай өткізесіз?
Шынар ЕЛУБАЙ, Әуетуристік агенттігінің қызметкері
– Жаз келді екен деп қарап жатуға болмайды ғой. Дегенмен, адамға демалыс та қажет. Барлығы ойдағыдай жүзеге асса, отбасымызбен ауылда аунап-қунап қайтуды жөн көріп отырмыз.
– Көшеде еркін жүргеніңізде сізді танып, амандасып жатса, қалай қабылдайсыз?
Елнар ЕРНАРҰЛЫ, студент
– Көшеде бізді атымызбен атамай, «Қоңыр» тобы кетіп бара жатыр дейді (күлді). Халық біз туралы айтып жатса, өнерде бар екенімізді сезініп қуанамыз.
– «Дәстүрлі әнге сұраныс азайды» деген пікірге қалай қарайсыз?
Бағила САҚАТОВА, зейнеткер
– Мұндай пікірмен келіспеймін. Күні бүгінге дейін дәстүрлі ән өзінің қалыбын жойған жоқ. Эстрада жанры төтеден келіп, аз уақыттың ішінде белең алған бір толқын секілді. Бірақ, ол белгілі бір кезеңге ғана тән құбылыс. Дәстүрлі әндердің тыңдаушылары жоғалған жоқ. Эстрадалық әндердің көбісі елдің есінде сақталмайды. Дәстүрлі әндерді тыңдай отырып, рухани ләззат аласың.
– Адамның қандай қасиеттерін жоғары бағалайсыз? Қандай адамды жаныңызға жақын тартасыз?
Майра АЙДОСОВА, психолог
– Шыншылдық, шынайылық, адалдық – бұлар әр адамға керек. Осы қасиеттер адамды ізгілікке жетелейді.
– Кітап оқисыз ба?
Гүлжан КЕРІМ, кітапханашы
Кітапты көп оқимын. Кітапқа қызығушылығым Сәкен Жүнісовтың «Ақан серісінен» басталды. Сол кітапты бас алмай оқып шыққаным бар. Қазір Мұхтар Мағауиннің Шыңғыс хан туралы кітабын оқып жатырмын. Жалпы, Мағауиннің шығармаларын қалдырмай оқуға тырысамын.
Еркежан СӘТІМБЕК
