ТАРИХЫМЫЗДЫҢ АЖЫРАМАС БӨЛІГІ
Астана қаласының әкімдігі «Қазақстан Республикасының рәміздері – Тәуелсіз мемлекеттің мызғымас негізі» атты ғылыми-тәжірибелік конференция өткізді.
Конференция жұмысын бастаған тарихшы-ғалым, профессор, Мемлекет тарихы институтының директоры Бүркіт Аяған тәуелсіздігіміздің айғағы болып табылатын мемлекеттік рәміздеріміздің өз деңгейінде ұлықталуы қажеттігіне баса назар аударды.
Астана қаласы Ішкі саясат басқармасының басшысы Болат Тілепов Мемлекеттік рәміздерді тарихымыздың бір бөлігі ретінде қарап, Елтаңба, Ту, Әнұрандай қастерлі рәміздерді құрметтеуді өскелең жастар санасына сіңірудің маңыздылығын атап өтті. «Көк байрақ сонау түркіден кешегі Абылай ханның кезіне дейін болған. Көк тудың шығу тегі де, қазіргі көгімізде желбіреп тұруы да бекер емес» деп түйіндеді өз сөзін басқарма басшысы.
Конференция жұмысына қатысқан өзге ғалымдар мен жоғары оқу орындарының өкілдері рәміздерге қатысты ойларын ортаға салды.
Айгүл УАЙСОВА