ТӘУЕЛСІЗДІК ТАРИХЫ СУРЕТШІЛЕР КӨЗІМЕН
Елордадағы Тәуелсіздік сарайында отандық және шетелдік суретшілер тобының «Art Balaban» көрмесі ұйымдастырылды.
– Тақырыбының ерек естілетінін білеміз. Балабан дегеніміз – өте сирек кездесетін, жылдам ұшатын, сұңқар тәріздес құс. Біз де өнер әлеміне соны серпін, жаңа леп әкелгіміз келеді. Ойласа келе Қазақстандағы және көршілес мемлекеттердегі қылқалам шеберлерінің басын қосып, осындай топ құруды шештік, – деді Астана қаласының Жас суретшілер бірлестігі төрағасы Өмірәлі Исмаилов. Өзі көрмеге бірнеше жұмыстарын ұсыныпты. Арасындағы «Ұлы дала елі» және «Байқоңыр» атты триптихтерін бір деммен жазылған дүние екенін айтты.
Көрмеге негізінен абстракция, реализм жанрындағы картиналар қойылыпты. Қонақтар, әсіресе, табиғат көрінісін бейнелейтін суреттерге қатты қызығушылық танытты.
– Қырғызстандық суретші Русланбек Жүнісәлиевтің картиналарынан ауылдың, даланың, қыр қызғалдақтарының иісі аңқиды. Осыдан-ақ суретшінің шеберлігін аңғаруға болады емес пе?! – деп ағынан ақтарылды Қазақ ұлттық аграрлық университетінің оқытушысы Баян Ақайдарова.
Ел егемендігінің 25 жылдығы мен «ЭКСПО – 2017» көрмесіне орайластырылған бұл шара алдағы уақытта республиканың өзге де өңірлерінде өтеді.
Ботагөз МАРАТҚЫЗЫ