ЖАСТАР ЖЕМҚОРЛЫҚҚА ҚАРСЫ
Астанадағы Тәуелсіздік сарайында ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Астана қаласы бойынша департаментінің ұйымдастыруымен дөңгелек үстелі мәжілісі өтті.
Жиынның тақырыбы – «Сыбайлас жемқорлыққа қарсы іс-қимылдағы жастар мен жастар ұйымдарының ғылыми және педагогикалық қызметкерлерінің рөлі».
– Қазақстан тәуелсіздік алғаннан бері қаншама ауқымды жұмыстар атқарылды. Еліміз көркейіп, халықтың әл-қуаты артты. Елбасының Ұлт жоспары бойынша бес институционалды жүзеге асырудағы алғашқы реформа кәсіптік мемлекеттік аппаратты қалыптастыру болып саналады. Мемлекеттік қызметте кәсіпқой мамандар жұмыс істеуі қажет. Себебі мемлекеттік қызметшілер – Елбасының сарабдал саясатын жүзеге асыратын жауапты тұлғалар. Сондықтан олардың білімі мен біліктілігі жоғары болу керек, – деді жиында алғашқы сөзді алған ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Астана қаласы бойынша департаментінің басшысы Тілеген Қаскин.
Шара барысында сыбайлас жемқорлыққа қарсы іс-қимыл бағдарламасының орындалу барысындағы жастарды орны туралы көбірек сөз қозғалды. Белгілі ғалымдар мен жастар ұйымдарының өкілдері баяндама жасап, өздерінің осы салаға қатысты пікірлерін талқыға салды.
Азамат ЕСЕНЖОЛ