«Жасыл аймақ» тұжырымдамасы
2050 жылға қарай елдегі баламалы және жаңартылатын энергия үлесі 50 пайызға жетеді деп жоспарланып отыр. Бұл туралы кеше ҚР Президенті жанындағы ОКҚ ұйымдастырған брифингте ҚР Қоршаған ортаны қорғау министрі Нұрлан Қаппаров мәлімдеді.
30 мамыр күні Елбасы Н.Назарбаев «Қазақстан Республикасының «жасыл экономикаға» көшуі жөніндегі тұжырымдама туралы» Жарлыққа қол қойған болатын. «Жасыл экономика» еліміздің орнықты дамуын қамтамасыз етудің маңызды құралдарының бірі болып саналады. Аталған тұжырымдама аясында 2050 жылға қарай ЖІӨ 3 пайызға артып, 500 мыңнан астам жаңа жұмыс орны ашылады деп жоспарланып отыр. Министрдің айтуынша, «жасыл экономикаға» көшу үшін қажетті инвестициялар көлемі жыл сайын ЖІӨ-нің шамамен 1 пайызын құрайды. Бұл 3-4 млрд АҚШ долларына тең.
– Энергетикада біз баламалы және жаңартылатын энергияның үлесін 2030 жылға қарай – 30, ал 2050 жылға қарай 50 пайызға жеткізу мақсатын қойып отырмыз. Энергия тиімділігін жоғарылатуға бағытталған шараларды жүргізу нәтижесінде электр қуатын өндіру қажеттілігі 2030 жылға қарай – 13, ал 2050 жылға қарай 10 пайызға азаятын болады, – деді министр.
Сондай-ақ, сала басшысы тұжырымдама көздеген бірқатар міндеттерді жіктеп берді. Біріншіден, «Жасыл экономикаға» көшу 2050 жылға қарай 500 мың жұмыс орнын ашуға мүмкіндік береді. Екіншіден, аталған тұжырымдама Қазақстан әлемнің дамыған 30 елінің қатарына кіру жөніндегі мақсатына қол жеткізуін қамтамасыз етеді. Үшіншіден, 2030 жылға қарай қазақстандықтардың электр энергиясының 11 пайызын жел мен күннен, ал 8 пайызын атомнан алуға мүмкіндік береді. Одан бөлек, елімізде бірқатар жылу электр стансалары көмірден газға көшірілетіні де белгілі болды. Бүгінде елімізде 3,8 трлн текше метр газ қоры бар екендігі дәлелденген. Оны министрлік «көмір мен жаңаратын энергия көздері арасындағы көпір сынды» транзиттік қор ретінде қарастырады.
Айнұр САНАБЕК