«Президенттің бес әлеуметтік бастамасы» ел өміріне қажетті мәселелердің шешім жолдарын көрсеткен. Елбасы студенттердің жағдайын назардан тыс қалдырмай, жатақхана салуды тапсырған еді. Сонымен қатар, жуырда Астанадағы мұғалімдерге де жатақхана берілетіні хабарланды.
Студенттер мүддесіне – 118 миллиард
Студенттер жатақханасы әлі күнге дейін өзекті болып келгені жасырын емес. Жоғары оқу орындарының, әсіресе 4-курс студенттері жиналып, пәтер жалдап тұруға мәжбүр болады. Мемлекет басшысы осы мәселені басты назарға алып, өз үндеуіндегі үшінші бастамасында 2022 жылдың соңына дейін студенттерге арнап кемінде 75 мың орындық жаңа жатақхана салуды ерекше тапсырды. Нұрсұлтан Назарбаевтың тапсырмасынан кейін тиісті мекемелер тез арада жұмысқа кірісіп кеткені де хабарланды. Білім және ғылым министрі Ерлан Сағадиев студенттерге жатақхана салу жұмыстары биыл басталатынын, оны жергілікті әкімдіктер, жоғары оқу орындары, жеке компаниялар бірлесіп шешетінін мәлім етті.
Біз осы тұста студенті көп Еуразия ұлттық университетінің жатақханаларындағы жағдайды анықтап көрдік. Мұнда жатақхананың құны жылына 70-80 мың теңге аралығын құрайды. Биыл оқу орнына 7 мыңнан астам студент түсіпті. Бұған қоса, жатақхана бойынша шешімін таппай тұрған біршама проблема да баршылық. Мәселен, былтыр №6 студенттер үйінің бір бөлмесіне сегіз адамнан орналастырылған кез болыпты. Ал 4-курс студенттері арасында көп балалы отбасылардан шыққан, мүгедек секілді арнайы жеңілдігі барынан өзгесі биыл тағы да пәтер жағалап жүр. Былтырғы жартас әлі сол қалпында. Дегенмен университет басшысы алдағы жылдары бұл мәселе біртіндеп шешілетінін жеткізді. «2019-2021 жылдары 3 блоктан тұратын 2467 орындық жатақхана құрылысы басталмақ. Бұл – Елбасы тапсырмасын орындау жолындағы жауапты іс-шара» деді Ерлан Сыдықов есеп беру жиынында.
Ал студенттер үйінің құрылысы үшін жұмсалатын қаржы республикалық бюджеттен бөлінбек. Мемлекет басшысының тапсырмасын орындау мақсатында 118 миллиард теңге қарастырылған. Бірақ бұл сома алдағы бес жыл ішінде кезең-кезеңімен бөлініп отырады. Айта кетер бір мәселе, жатақханалардың салынуы оқу бағасына еш әсер етпейді.
Шағын пәтерлер де салынады
Қазіргі уақытта Астана әкімдігі мектеп мұғалімдерін жатақханамен қамтамасыз ету мәселесімен айналысып жатыр. Қалалық Білім басқармасының басшысы Әнуар Жанғозиннің айтуынша, қазір 188-көшенің бойында орналасқан бір жатақхананың құрылысы аяқталып қалды. Мұнда әкімдік 250 маманды қоныстандырмақ. Олардың арасында еңбек өтілі жоғары, оқу орнын қызыл дипломмен бітірген ұстаздарға басымдық беріледі. Ал жатақханаға өтініш берген мұғалімдер арнайы құрылған комиссия арқылы іріктеледі. Бір өкініштісі, бөлмелердің тар болуына байланысты бұл жатақхана әзірге тек отбасын құрмаған ұстаздарға ғана беріледі.
Осы орайда тәжірибелі мұғалімдердің көбі отбасылы жандар екені, оларға қандай көмек көрсетілетіні туралы ой келері анық. Астанаға жыл сайын өңірлерден 400-500 мұғалім келеді. Олардың бәрін бір мезетте жатақханамен қамтамасыз ету мүмкін емес. Басқарма басшысының айтуынша, хостелдер ұсынылмақ. Ал оның құны айына 35-45 мың теңгені құрайды.
– Аймақтардан келетін ұстаздар саны аз емес әрі олардың көбі – отбасылы жандар. Осыған байланысты әзірге өз саласында үздік атанған ұстаздарды жатақханаға орналастыруды жоспарлап отырмыз. Мысалға, университет түлегі болса, оның жетістіктері мен тағылымдамасы басты назарға алынады. Әрине, еңбек өтілі бар мамандар да ескеріледі, – дейді Әнуар Жанғозин.
Алдағы уақытта мектеп ұстаздарына арналған шағын пәтерлердің құрылысын бастау да жоспарда бар.
