Ардагерлер мен жастар кездесті
Елдің туын көтеріп, тәуелсіздік талаптарын орындау ісіне батыл бетбұрыс жасаған бүгінгі таңда адамзаттық игіліктерді, халқымыздың ғасырлар бойы армандаған мәдени-рухани мұрағаттары мен ұлттық тәлім-тәрбие саласындағы, білім жүйесіндегі ізденістерін көрсету арқылы жастардың бойында ұлттық сананы қалыптастыру – басты міндет. Отаншылдық тәрбиеде әсіресе Ұлы Отан соғысында ерлік көрсетіп, жеңіске үлес қосқан әке-аталардың рөлі айрықша.
Осы мақсатта Жеңістің 78 жылдығына орай елордадағы кәсіптік-техникалық колледжде «Жастарға патриоттық тәрбие беру» тақырыбында салтанатты іс-шара өтті.
Есіл ауданы жастарына патриоттық тәрбие беру жөніндегі комиссия ұйымдастырған іс-шараға қатысушылар арасында ауған соғысы ардагерлері мен тыл еңбеккерлері Салман Героев, Рысты Атығаева, Талғат Солтыбаев, Рафаил Аблаков және колледж студенттері болды.
Кездесуге келген жасөспірімдер ардагерлердің ғибратты да қызықты әңгімелерін ықыласпен тыңдады. Жиында сондай-ақ мерекелік концерт ұйымдастырылып, ардагерлерге сый-сияпат табысталды. Аға ұрпақ өкілдері ақыл-кеңесін айтты. Сондай-ақ патриоттық тақырыпта сұрақ-жауап викторинасы ұйымдастырылды.
Ең бастысы, ардагерлер мен жасөспірімдердің кездесуінде отандық патриотизмнің ұрпақтан-ұрпаққа жалғасып жатқаны аңғарылды.
Жастарға патриоттық тәрбие беру ісіндегі жетекші рөл Астана қаласының ардагерлер ұйымдарына тиесілі. Ұйым жастардың рухани құндылықтарын қалыптастыруға, мәдени-тарихи дәстүрлер мен ұрпақтар арасындағы сабақтастықты сақтауға бағытталған үлкен жұмыс жүргізуде.
Өрік ИМАНҒОЖИНА,
Есіл ауданының еңбек ардагері