Аймақтар тартуы — астанаға
Қазақтың кіндік қаласындағы Наурыз тойына еліміздің бірнеше аймақтарынан арнайы делегация келеді. Олар астаналық ағайынды әсем ән мен тәтті күйге бөлеп қана қоймай, өздерінде шығарылатын өнеркәсіп, ауыл шаруашылығы, қолөнер өнімдерінің жәрмеңкесін өткізеді.
Елордамыз әдемі күйге енуде
Ұлыстың ұлы күнін қарсы алуға биылғы дайындық төтенше жоғары деңгейде екенін Астана көшелерінің ажарынан танисың. Қаланы мерекелік безендіруді бұл жолы аудандық әкімдіктер «AdvArt» сыртқы жарнама агенттігіне тапсырған.
– Қаланың орталық көшелерінде 28 бильборд, 72 пилон, 25 ротонда, 10 экструдер мерекелік нақышта безендірілді. «Қазақ елі», «Бәйтерек» монументі сияқты маңызды алаңдарға түрлі-түсті жалаулар ілінеді, ал «Арай», «Жерұйық» саябақтарының алдында көктемгі табиғаттың жаңғыруын айшықтайтын жалаулы паннолар қойылмақ. Оған түрлі формада декоративті жарық элементтерімен безендірілген көшедегі шамдарды, шағын гүлзарлар мен тал-теректерді, көпірлерді, субұрқақтарды қосыңыз. Үш жерде – Оқушылар сарайының алдында, Түркістан және Достық көшелерінің қиылысында, «Керуен» СОО маңайында «Ауыл» композициясы орнатылды. Қаланың көлік нөпірі көп 15 күрежолына және 4 көпіріне құттықтау сөзі бар, жарықпен безендірілген аркалар жасалынды және кісі аяғы көп жүретін көше қиылыстарына қызғалдақ, төрт түлік сияқты наурыз нышандарын бейнелейтін шағын архитектуралық формалар қойылды, – деп хабарлайды аталмыш жарнамалық-өндірістік компанияның директоры Ян Викторович.
Жалт-жұлт жарық шоуы
Биылғы Наурыз мейрамы Астана тұрғындары мен қонақтары үшін қаланы ерекше сән-салтанатқа бөлейтін жарық-шашу шоуымен басталатын болып отыр. Бұл көріністі жарықтандыру саласының әлемге әйгілі дизайнері Курт Вермюлен Астана қаласы әкімдігінің шақыруымен келіп көрсетпекші. Жарық шоуы 2013 жылдың 20 наурызында сағат 21.00-де елордамыздың әдемі жерлерінде көрсетілмекші.
Әдемілігі жағынан таңғажайып бұл көрініс көрермендерді айрықша әсерге бөлейтіні сөзсіз. Дизайнердің жарық берудегі өзіндік шығармашылық қабылдауы, сәулеттік жобаларға қатысты эмоционалдық және инновациялық көзқарастары, сондай-ақ, прагматикалық, перфекционистік және техникалық білімін көркемдік әдісте пайдалануы мен автордың ой-қиялының жемісі осындай керемет өнер жасауға мүмкіндік береді.
Жарық шоуы – Наурыз мейрамы мерекесіне арналған салтанатты іс-шаралардың өзіндік бір бастауы. Биылғы жылы Астана қаласының 15 жылдығы қарсаңында, қаламызда шығыс Жаңа жылын ойдағыдай тойлау үшін республиканың барлық аймақтарынан делегациялар келеді. Қаз-қатар киіз үйлер тігіліп, халықтық көпшілік серуенге бүкіл қала тұрғындарының қатысуын қамтиды.
Сонымен, ертең кешке қарай Астанада жарық-шашу думаны басталып, жұртшылықты Наурыз мейрамының қызығына шақыратын болады. Әдемілігі жағынан таңғажайып бұл көрініс астаналықтар мен елорда қонақтарын айрықша әсерге бөлейтіні сөзсіз. Олай болса, көшеге шығып, керемет көріністі тамашалайық, ағайын, демекпіз.
Аймақтар жәрмеңкесіне асығыңыздар!
Ұлыстың ұлы күні жақындаған са-йын Астанада мерекеге дайындық жұмыстары қыза түсуде.
Кеше қалалық әкімдік мерекелік шараны тойлауға қатысты маңызды мәлімет таратты. Наурыз тойының ең ауқымды бағдарламасы «Қазақ елі» монументі алдындағы алаңда өтпекші. Бұл шараның ерекшелігі Ақмола, Павлодар, Солтүстік Қазақстан, Қызылорда, Алматы облыстарынан және басқа өңірлерден келген кәсіпорындар өз өнімдерін сатылымға шығаратын болады. Сондай-ақ, облыстардан келген өкілтоп арнайы шатыр тігіп, онда астаналықтарға арнап дастарқан жаюды да жоспарлап отыр.
Астана қаласы Кәсіпкерлік және өнеркәсіп басқармасының хабарлауынша, жүзден астам өнеркәсіп орындары қатысатын бұл шарада 150 тоннадай өнім сатылымға шығарылмақшы. Атап айтқанда, жәрмеңкеге 3 тонна ет өнімдері, 22 тонна шұжық, 20 тонна сүт өнімдері, 15 тонна күнбағыс майы, 1 жарым тонна жұмыртқа, жарты тонна саңырауқұлақ, 15 тоннадай нан және кондитер өнімдері, 3 тонна кәмпит, 3 тонна тосап, 1жарым тоннадай қияр, 3 тонна қымыз, 1 тонна шұбат, 2 тонна бал, 2 тонна минералды сусын, 4 тонна шырын, 3 тонна балық өнімдері, 15 тонна күріш пен жарма, тағы басқа азық-түлік өнімдері жеткізілмекші. Сонымен қатар, он бес шақты қоғамдық тамақтану кәсіпорындары да қатыспақшы. Ал, Орталық алаңда өтетін мерекелік шарада оннан астам, «Атамекен – Қазақстан картасы» этно-мемориалды кешені маңында екі мейрамхана, дәмхана ұжымы қызмет көрсетеді.