Алтын саны артпай жатыр
Индонезияның Жакарта және Палембанг қалаларында өтіп жатқан Азия ойындарында ел қоржынына түскен жүлделер саны 16-ға жетті. Азиадада Қазақстан командасының еншісінде – әзірге 1 алтын, 5 күміс және 12 қола медаль.
21 тамыз, үшінші күн
Кирилл Казанцев – қола жүлдегер. Отандасымыз ел тарихында алғаш рет маунтинбайктен жүлде салды. Ол бірінші айналымда бәрінен бұрын келіп, мәреге жақындағанда Қытай спортшыларын алға оздырып алды.
Руслан Жапаров – қола жүлдегер. 80 кг салмақта ел намысын қорғаған таэквондошы жартылай финалда Иран спортшысына есе жіберіп алды. Сөйтіп Азиаданың қола жүлдесіне қол жеткізді.
Жансель Дениз – күміс жүлдегер. Таэквондошы қыз алтынға таласқан сайыста кореялық спортшыға басымдық беріп қойды.
Су добынан Қазақстан құрамасы – күміс жүлдегер. Қыздар командасы 5 кездесудің төртеуінде жеңіске жетті. Бұл сында алтын Қытайдың қанжығасында кетті.
Эльмира Сыздықова – қола жүлдегер. Әйелдер күресінен 76 кг салмақта белдескен Эльмира қола жүлде үшін күресте Оңтүстік Корея өкілін 5:2 есебімен жеңді.
Мейрамбек Айнағұлов – қола жүлдегер. Грек-рим күресінен 60 кг салмақта Мейрамбек Солтүстік Корея спортшысын 13:5 есебімен жеңіп, үшінші орынды иеленді.
Алмат Кебіспаев – күміс жүлдегер. Грек-рим күресінен 67 кг салмақта белдескен Алмас финалда Оңтүстік Кореяның өкілі Рю Зан Судан жеңілді.
22 тамыз, төртінші күн
Семсерлесуден Қазақстан әйелдер командасы – қола жүлдегер. Семсерлесудің сабля түрінен Тамара Почекутова, Әйгерім Сарыбай, Айбике Хабибуллина және Татьяна Приходько жартылай финалдан Қытай құрамасынан жеңілді. Спорттың бұл түрінде жартылай финалдан жеңіліс тапқандарға бірден қола бұйырады.
Александр Куликов – қола жүлдегер. Ескек есуден қазақстандық спортшы «слалом» бағдарламасы бойынша үшінші орыннан көрінді. Оның алдын жапон және қытай спортшылары орап кетті.
Семсерлесуден Қазақстан ерлер командасы – қола жүлдегер. Осы спорттың шпага түрінен біздің жігіттер жартылай финалда Жапонияға жол беріп, үздік үштікке енді. Бұған дейін семсерлесуден екі жүлде түскен еді.
Нұрлан Мырзабаев – қола жүлдегер. Қазақстандық таэквондошы 80 кг салмақта сынға түсіп, жартылай финалға дейін жетті. Соңғы сайысында кореялық спортшыдан бір ұпай айырмашылығымен жеңілді.
Дмитрий Баландин – қола жүлдегер. Рио Олимпиадасының чемпионы 100 метрге брасс әдісімен жүзуде Жапония және Қытай спортшыларынан қалып қойды.
Дайындаған
Орынбек ӨТЕМҰРАТ
Дереккөзі – olimpic.kz