بەيبىتشىلىك جانە كەلىسىم سارايىندا ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ ءانشىسى, رەسپۋبليكالىق جانە حالىقارالىق بايقاۋلاردىڭ لاۋرەاتى التىنشاش مۇقاتاەۆانىڭ «سامعا العا» موتيۆاتسيالىق شىعارماشىلىق كەشى ءوتتى. مادەنيەت جانە سپورت مينيسترلىگى مەن استانا قالاسى اكىمدىگىنىڭ قولداۋىمەن وتكەن كەشكە پرەمەر-ءمينيستردىڭ ورىنباسارى التاي كولگىنوۆ, مادەنيەت جانە سپورت ءمينيسترى اسحات ورالوۆ, ەلوردا اكىمىنىڭ ورىنباسارى ەرلان بەكمىرزاەۆ قاتىسىپ, ىزگى تىلەگىن جەتكىزدى.
اقيىق اقىن مۇقاعالي ماقاتاەۆشا ايتساق, ارۋلار ەلى – اياگوز قالاسىندا دۇنيەگە كەلگەن التىنشاش تاعدىردىڭ ءتۇرلى سىناعىنا سىنباي, قيىندىقتارعا ەش مويىماي, ونەردەن قۋات الىپ, ورلەي تۇسۋدە. رۋحى مىقتى, جىگەرى كۇشتى, ومىرگە عاشىق ادام. بالا كەزىنەن بەلگىلى ءانشى بولۋدى ارماندادى. سول ارمانىنا جەتۋ ماقساتىندا 2009 جىلى وتباسىمەن استاناعا قونىس اۋداردى. وسىندا قازاق تەحنولوگيا جانە بيزنەس ۋنيۆەرسيتەتى كوللەدجىندە, قازاق گۋمانيتارلىق-زاڭ ۋنيۆەرسيتەتىندە وقىپ, بىرنەشە ماماندىقتى يگەردى. الايدا ءانشى بولۋ ارمانىنان اينىماي, ءارى قاراي قازاق ۇلتتىق ونەر ۋنيۆەرسيتەتىنە ءتۇسىپ, بەلگىلى ءانشى-ۇستازدار سەمبەك جۇماعالي مەن مايرا داۋلەتباقتان ءتالىم الىپ, ونەرىن شىڭدادى. ونىڭ ونەرگە قانات قاعىپ, ۇلكەن ساحناعا العاش شىعۋىنا «قاراقات» مەكتەپ-ستۋدياسى, قىدىرالى بولمانوۆ پەن قاراقات ءابىلدينا جول اشتى.
قازىر ونەردە قولداۋشى ارىپتەستەرى وتە كوپ. سولاردىڭ ءبىرازى التىنشاشتىڭ العاشقى ۇلكەن شىعارماشىلىق كەشىنە قاتىسىپ, ساحنادان ءان سالىپ, كەش يەسىنە قولداۋ كورسەتتى. اتاپ ايتقاندا, قازاقستاننىڭ ەڭبەك سىڭىرگەن قايراتكەرلەرى قانات جانە سۆەتلانا ايتباەۆتار, التىناي جوراباەۆا, ارداق بالاجانوۆا, سونداي-اق, يبراگيم ەسكەندىر, زارينا وماروۆا, اۋكا, استانا قالاسى «جاستار» تەاترىنىڭ ارتىستەرى, «Alem» زاماناۋي بي بالەتى, «Laura Abat» ونەر ورتالىعى, استانالىق تسيرك ارتىستەرى اتسالىستى.
التىنشاش مۇقاتاەۆانىڭ ءوزى احمەت جۇبانوۆ, كەڭەس دۇيسەكەەۆ, تولەگەن مۇحامەدجانوۆ, بولات قوحامانوۆ, احمەديار ەسمۇحانوۆ, مارات وماروۆ سىندى بەلگىلى كومپوزيتورلاردىڭ, قازىرگى سازگەرلەردىڭ اندەرىن شىرقادى.
«مەن شىعارماشىلىق ءان كەشىمدى قايدا وتكىزەمىن دەپ كوپ ويلانىپ, مىڭ تولعاندىم. اقىرى تاڭداۋىم بەيبىتشىلىك جانە كەلىسىم سارايىنا ءتۇستى. مۇنىڭ وزىندىك سىرى بار. قازىرگى جاعدايدا, دۇنيە دۇرلىككەن شاقتا, بىزگە بەيبىتشىلىك اۋاداي قاجەت. ال استانا ماعان شابىت بەردى. وي-ءورىسىمدى كەڭەيتتى. مەن باس قالاعا عاشىقپىن. ۇلكەن ساحنادا جەكە شىعارماشىلىق كەشىن وتكىزۋ – ءاربىر ورەسى بيىك ونەرپازدىڭ اسقاق ارمانى. بۇگىن – مەنىڭ سوناۋ بالالىق ارمانىم ورىندالعان كۇن» دەيدى التىنشاش مۇقاتاەۆا.
